ჯანდაცვის მინისტრის მოადგილის თამარ გაბუნიას განცხადებით, კორონავირუსის საწინააღმდეგო ვაქცინების - "ფაიზერისა" და "ასტრაზენეკას" ეფექტურობა და ხარისხი მაღალია, როგორც დაავადების გადაცემის თავიდან აცილების, ასევე რთული შემთხვევების თავიდან ასარიდებლად. მისივე განმარტებით, მოქალაქეებს ამ ორ ვაქცინას შორის არჩევანის გაკეთების შესაძლებლობა ექნებათ:

"დღეს, საღამოდან "ფაიზერის" ვაქცინა აისახება რიგის დაჯავშნის პორტალზე. მოქალაქეებს ექნებათ საშუალება, გააკეთონ არჩევანი "ასტრაზენეკასა" და "ფაიზერს" შორის. მინდა აღვნიშნო, რომ "ფაიზერის" ეფექტურობა, ისევე, როგორც "ასტრაზენეკას", ძალიან მაღალია, როგორც დაავადების გადაცემის თავიდან აცილების, ასევე რთული შემთხვევების, განსაკუთრებით კი ლეტალობის შემთხვევების აღმოფხვრისთვის. "ფაიზერის" და "ასტრაზენეკას" ვაქცინების შემთხვევაში გარანტირებული ხარისხი გვაქვს. დღეიდან უკვე გაიხსნა რეგისტრაცია 65 წელს ზემოთ პირებისთვის.

"ფაიზერის" ვაქცინით ვაქცინაცია ჩატარდება ექვს სამედიცინო დაწესებულებაში. სპეციალური მოთხოვნები, რომელიც ჯანდაცვის სამინისტრომ ამისთვის დააყენა, ითვალისწინებს სპეციფიკურ კრიტერიუმებს, რათა უზრუნველყოფილი იყოს ვაქცინის შენახვის შესაბამისი პირობები. მოგეხსენებათ, ვაქცინას შესანახად სჭირდება ულტრაცივი ჯაჭვის რეჟიმი, -80, -60 გრადუსის ფარგლებში. მისი შენახვა 2-დან 8 გრადუსამდე შეძლებელია მხოლოდ 3-5 დღის განმავლობაში. მაქსიმალური ეფექტის უზრუნველყოფისთვის და დოზების დანაკარგის თავიდან ასაცილებლად, ვაქცინაცია ჩატარდება 6 კლინიკაში. თბილისში არის 4 კლინიკა: ბოკერიას სახელობის საავადმყოფო, კავკასიის მედიცინის ცენტრი, "ამტელ კლინიკა" და ასევე, რესპუბლიკური საავადმყოფო. აჭარაში იქნება ბათუმის რესუბლიკური საავადმყოფო და ქუთაისში ცხაკაიას სახელობის ინტერვენციული მედიცინის ცენტრი", - განაცხადა გაბუნიამ.