გურჯაანში მომხდარი მკვლელობის გარშემო ახალი დეტალები ხდება ცნობილი - სოფელ ჩუმლაყში, ატმის ბაღებში მომხდარი სისხლიანი გარჩევის დროს მოკლული ახალგაზრდა მამაკაცი ყანაში ტრაქტორით მიდიოდა, რა დროსაც მისი მიმართულებით ცეცხლსასროლი იარაღიდან რამდენჯერმე ისროლეს.

მრავლობითი ჭრილობის მიყენების შედეგად მამაკაცი ადგილზე გარდაიცვალა. დაჭრილია სამი პირი, მათ შორის ერთ-ერთი კრიმინალური ავტორიტეტი. ისინი გურჯაანის საავადმყოფოში არიან გადაყვანილი.

ადგილზე მობილიზებულია კრიმინალური პოლიციის ათობით თანამშრომელი.

გავრცელებული ცნობით, თავდამსხმელს კრიმინალური ავტორიტეტის მოკვლა სურდა, თუმცა მისი მუშა მოკლა, რომელიც არ არის ადგილობრივი მაცხოვრებელი.

მომხდარზე დაკავებული ამ ეტაპზე არავინაა. უცნობია, ჰყავს თუ არა გამოძიებას სავარაუდო ეჭვმიტანილი.