ექთნის გარდაცვალების საქმე თავდაყირა დგება - რა კვლევები ჩაიტარა მეგი ბაქრაძემ ვაქცინაციამდე და რატომ ვერ აღმოუჩნეს რეანიმაციული დახმარება ანაფილაქსიური შოკის განვითარებისთანავე?

შემთხვევა - 15:26, 21 Mar, 2021

4033

ახალციხეში ვაქცინაციის შედეგად გარდაცვლილი ექთნის საქმე თავდაყირა დგება - გამოიკვეთა რამდენიმე უზუსტობა, რომელიც თავდაპირველ ინფორმაციასთან წინააღმდეგობაში მოდის. კერძოდ, რეანიმატოლოგმა გიორგი აფციაურმა თავად აღიარა, რომ ანაფილაქსიური შოკის განვითარების დროს კლინიკაში არ იმყოფებოდა, თუმცა მანამდე კლინიკის ექიმები აცხადებდნენ, რომ მეგი ბარამიძეს აფციარუმა დახმარება რამდენიმე წამში აღმოუჩინა.

ასევე, ცნობილი ხდება ისიც, რომ გარდაცვლილმა მედიკოსმა ვაქცინაციამდე გარკვეული კვლევები ჩაიტარა და ამის შემდეგ მედიკამენტები დაუნიშნეს, თუმცა საავადმყოფოს ადმინისტრაცია არ ადასტურებს მედიკამენტების შესახებ არსებულ ინფორმაციას და აცხადებს, რომ აღნიშნულის შესახებ არაფერი იცის.

როგორც გამოკვლევების პასუხიდან ირკვევა, მეგი ბაქრაძეს დაბალი ჰემოგლობინი და მაღალი პოთრომბინი ჰქონდა, რაც სისხლის შედედების რისკს შეიცავს. ამის მიუხედავად, მას ვაქცინაცია მაინც ჩაუტარდა. დაღუპულის ახლობლებს არ აქვთ ინფორმაცია, რამდენი ხანი იღებდა ბაქრაძე მედიკამენტებს და კონკრეტულად რომელი წამლები დაუნიშნეს მას.
შეგახსენებთ, რომ თრომბული გართულების რისკთან დაკავშირებით ევროპის რამდენიმე ქვეყანამ ვაქცინაცია შეაჩერა, სანამ ვაქცინასთან დაკავშირებული გამოკვლევები არ დასრულდებოდა.