რამდენიმე კვირაში შეერთებული შტატები იშვიათი სანახაობის - "X თაობის ციკადების" დაბრუნების მომსწრე გახდება. მილიარდობით მცირე ზომის მწერი, ამერიკული "პერიოდული ციკადა", რომლებიც მიწისქვეშეთში, სიბნელეში, 17 წლის განმავლობაში იზრდებოდა, ერთდროულად გამოჩნდება დედამიწის ზედაპირზე.

ზრდასრული ციკადა 2,5-3 სმ სიგრძისაა. ისინი ე.წ. პერიოდულ მწერებს განეკუთვნებიან. პერიოდული ციკადა ცხოვრობს ხის ფესვებში, დედამიწის ზედაპირიდან 30 სმ სიღრმეში და ფესვების წვენით იკვებება. 17 წლის შემდეგ მწერები ერთდროულად გამოდიან დედამიწის ზედაპირზე და ხის ფოთლებზე იბუდებენ. აქ რამდენიმე დღეში ისინი ზრდას ამთავრებენ და გამრავლების პროცესს იწყებენ: მამრი ციკადა "მღერის", რათა მოიზიდოს პარტნიორი, დაწყვილდეს და მოკვდეს. რამდენიმე დღეში, 600-მდე კვერცხის დადების შემდეგ მდედრი ციკადაც კვდება. ზრდასრულ ციკადებს ამ პროცედურისთვის სულ 2-3 კვირა აქვთ.

6 კვირაში კვერცხებიდან ჭუპრები გამოიჩეკებიან, რომლებიც სწრაფად ძვრებიან მიწაში და ყველაფერი თავიდან იწყება.

ციკადების შესწავლა 1907 წლიდან მიმდინარეობს და მათზე დაკვირვების გააადვილებლად მათ "თაობების" ნუმერაცია მიანიჭეს. 17-წლიანი ციკლის ციკადების XVII თაობა არსებობს. სამწუხაროდ, რამდენიმე თაობა უკვალოდ გაქრა.

III თაობა გამოჩნდა 1996 და 2013 წლებში. IX თაობა 2003-ში, X - ყველაზე დიდი თაობა, რომელიც გავრცელებულია ნიუ-იორკში, ჩრდილოეთ კაროლინაში, ილინოისსა და მიჩიგანში, 2004 წელს გამოჩნდა და სწორედ მას ეყოდებიან ახლა. XIII თაობა 2007 წელს გამოჩნდა და მას 2024 წელს ელოდებიან.

ციკადა ადამიანისთვის და ცხოველებისთვის საფრთხეს არ წარმოადგენს. მას არც მცენარეებისათვის მოაქვს დიდი ზიანი, ციკადებმა შეიძლება მხოლოდ ახალგაზრდა ნარგავები დააზიანონ.

ციკადების 17 წლიან ციკლსა და დედამიწის ზედაპირზე ერთდროულ გამოჩენას მეცნიერები თვითგადარჩენის ინსტინქტს უკავშირებენ. დიდი გამყინვარების პერიოდში ციკადები მიწაში დაიმალნენ და სხეულის განვითარებისა და ჩამოყალიბების ხანგრძლივი 17 წლიანი ციკლი აირჩიეს, რათა დედამიწაზე გამოჩენისა და გამრავლების დროს ისინი ამ პროცედურას საბოლოოდ ჩამოყალიბებულნი შეხვედროდენ. რაც შეეხება ეღთდროულ გამოჩენას - ამ მეთოდით ციკადები მტაცებლებისგან იცავენ თავს. მწერების დიდი რაოდენობა იმის გარანტიაა, რომ მტაცებლის თავდასხმისგან მეტი გადარჩება.