ახალციხეში ვაქცინაციის შედეგად გარდაცვლილი ექთნის ოჯახის ადვოკატის ვახტანგ ბარამაშვილის განცხადებით, საქმის გარშემო ოჯახს უამრავი კითხვა დაუგროვდა, კრძოდ - რამდენად დროულად აღმოუჩინეს დახმარება, როდესაც მეგი ბარამიძემ შეუძლოდ იგრძნო თავი და რა აბები მისცეს წინა დღით, რამაც თავი აატკივა. ამასთან, ოჯახს აქვს ეჭვი, რომ მედიკოსი თბილისში გადაყვანამდე გარდაიცვალა, თუმცა, ამის შესახებ კლინიკამ დამალა:

"ოჯახს აქვს კითხვები რამდენად დროულად აღმოუჩინეს დახმარება. ოჯახს აინტერესებს, ხომ არ იყო მეგი გარდაცვლილი უკვე ახალციხეში და ხომ არ მოხდა უკვე გარდაცვლილის თბილისში გადმოსვენება.

ოჯახის ინფორმაციით, წინა დღეების განმავლობაში მეგის დაუნიშნეს რაღაც ტაბლეტები, რაზეც არ ვართ ინფორმირებული ზუსტად რა ტაბლეტია, თავად მეგიმაც არ იცოდა, რა ტაბლეტებზეა საუბარი, რა აბები მიიღო. მათ შორის, ეს შესაძლოა საკვანძო აღმოჩნდეს.

მკლავზე აქვს სავარაუდოდ ალერგიული რეაქცია და ეს, რა თქმა უნდა, დამატებით ეჭვებს ბადებს," - განაცხადა ბარამაშვილმა.