18 მარტს კახეთში, სოფელ კაკაბეთში მომხდარი მკვლელობის ფაქტზე პოლიციამ 40 წლის მამაკაცი დააკავა. დანაშაულში ბრალდებულმა საკუთარ მეზობელს ტრაქტორით გადაუარა. როგორც გარდაცვლილის ოჯახის წევრები აცხადებდნენ, შემთვევამდე ცოტა ხნით ადრე ისინი ერთ სუფრაზე იმყოფებოდნენ, გარეთ გასვლის შემდეგ კი ეს საზარელი ფაქტი მოხდა, რის შემდეგაც დამნაშავე მიიმალა.
შსს-ს მიერ გავრცელებული ინფორმაციის თანახმად, დანაშაული 4-დან 7 წლამდე თავისუფლების აღკვეთას ითვალისწინებს:
"შინაგან საქმეთა სამინისტროს კახეთის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო ღონისძიებების შედეგად, 1981 წელს დაბადებული ი.მ. დააკავეს. მას ბრალი ტრანსპორტის მოძრაობის უსაფრთხოების წესის დარღვევაში ედება, რამაც ადამიანის სიცოცხლის მოსპობა გამოიწვია.
დანაშაული 4-დან 7 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ ბრალდებული მიმდინარე წლის 18 მარტს, ღამით, საგარეჯოს მუნიციპალიტეტის სოფელ კაკაბეთში ტრაქტორით შეეჯახა ქვეითად მოსიარულე თანასოფლელს - 1965 წელს დაბადებულ ნ.პ. რის შემდგომაც შემთხვევის ადგილიდან მიიმალა ნ.პ. შემთხვევის ადგილზე გარდაიცვალა.
გამოძიება საქართველოს სსკ-ის 276-ე მუხლის მე-6 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია" - ნათქვამია განცხადებაში.
მასალის გამოყენების პირობები