კომაში ჩავარდნილი მედიკოსი: კვლევები არსად ტარდება, შესაძლოა ემოციური ფონი ყოფილიყო

კომაში ჩავარდნილი მედიკოსი: კვლევები არსად ტარდება, შესაძლოა ემოციური ფონი ყოფილიყო - რა ვერსიებზე საუბრობენ სპეციალისტები

შემთხვევა - 17:07, 18 Mar, 2021

1545

ახალციხეში მედიკოსის ვაქცინაციის შემდეგ კომაში ჩავარდნის შემთხვევას სპეციალისტები ეხმაურებიან. ინფექციონისტ მაია ბუწაშვილის განცხადებით, არც ერთ ქვეყანაში არ ტარდება წინასწარი კვლევა ვაქცინის გაკეთებასთან დაკავშირებით, ასეთი გვერდითი მოვლენები კი ძალიან იშვიათია. ბუწაშვილის თქმით, სრულიად შესაძლებელი იყო, კომაში ჩავარდნა ემოციურ ფონზე განვითარებულიყო:

"ასეთი ალგორითმი და რეკომენდაცია არ არის არც ერთ ქვეყანაში, რომ ვაქცინამდე აუცილებელია რაიმე გამოკვლევის ჩატარება, შესაბამისად, გამოკვლევები არ ტარდება. რაც შეეხება ამ მოვლენას, როგორც ჩანს, უკიდურესად იშვიათ მოვლენასთან გვაქვს საქმე, თუმცა არის ძალიან იშვიათად ე.წ. ანაფილაქსიური რეაქცია, ანუ ალერგიული რეაქცია. მისი მართვა, ასე თუ ისე, კარგად იციან ჩვენმა ექიმებმა, დატრენინგდნენ. იმედია, კარგად დამთავრდება ეს შემთხვევა.მე დეტალები არ ვიცი, რა მოხდა იქ. ასევე, შესაძლებელია იყოს გულყრა, თეორიულად შესაძლებელია, ემოციურ ფონზეც განვითარდეს მსგავსი შემთხვევა. იმდენად ისვიათია ასეთი მოვლენა, რომ ამის გამო ყველა ასაცრელი ადამიანის გამოკვლევა არარეალისტურია" - განაცხადა ბუწაშვილმა.

"ერთეული შემთხვევები არ ნიშნავს, რომ გლობალურად ვაქცინაცია ცუდია, თუმცა, ერთეული შემთხვევები როცა ხდება, მაქსიმალური ეფექტურობა უნდა იყოს გამოჩენილი სახელმწიფო ინსტიტუტების მიერ და ზუსტად ვთქვათ, რამ გამოიწვია - იყო ეს ანაფილაქტური შოკი, სხვა მიზეზები და ა.შ. თუ კი ეს იყო რეაქცია ვაქცინაზე, რატომ არ არის ადგილზე უზრუნველყოფილი იმგვარი პირობები, რომ მომენტალურად გაეწიოს სასწრაფო სამედიცინო დახმარება. თუ არის გაწეული და მაინც ასეთი შედეგია, ეს კიდევ ცალკე თემაა. მთავარია ჩვენ გვქონდეს მზადყოფნა ყველა შესაძლო შემთხვევისთვის" - განაცხადა გენეტიკის ეროვნული ლაბორატორიის ხელმძღვანელმა გიორგი ჩალაძემ.