ინფექციური პათოლოგიის, შიდსის და კლინიკური იმუნოლოგიის ცენტრის გენერალურმა დირექტორის, თენგიზ ცერცვაძის განცხადებით, ჯერ-ჯერობით დადასტურებულია, რომ უშუალოდ ვაქცინაციას სიკვდილის არც ერთი შემთხვევა არ გამოუწვევია.

მისივე განმარტებით, “ასტრაზენეკას“ ვაქცინით აცრილია 16 მილიონი ადამიანი. მათგან 30 შემთხვევაა, როცა თრომბოემბოლიური გართულება განვითარდა, ხოლო 4-5 ადამიანი გარდაიცვალა, თუმცა ოფიციალურად დადასტურდა, რომ ეს ვაქცინაციის გამო არ მომხდარა.

"პირველი ასეთი შემთხვევა ავსტრიაში დაფიქსირდა, შემდეგ დანიაში, იტალიაში და რამდენიმე ქვეყანამ ვაქცინაცია შეაჩერა, ოღონდ მათ ხაზი გაუსვეს, რომ შეჩერდა დროებით - ორი კვირით, იმის გარკვევამდე თრომბოემბოლიზმის განვითარების და გარდაცვალების შემთხვევები იყო თუ არა ვაქცინასთან დაკავშირებული. ამაზე ინტენსიურად იმუშავა, ჯანმოს სპეციალურმა ვაქცინაციის უსაფრთხოების კომისიამ, ევროპის წამლის სააგენტომ და უამრავმა ორგანიზაციამ საკუთარი ინიციატივით. მათ ოფიციალური დასკვნა უკვე გამოაქვეყნეს - არც ერთ შემთხვევაში არ დადასტურდა, რომ თრომბოემბოლიზმის განვითარება დაკავშირებული იყო ასტრაზენეკას ვაქცინის მიღებასთან. როცა პოპულაციურად დაითვალეს და ნახეს 16 მილიონი არავაქცინირებული ადამიანი, აღმოჩნდა, რომ 16 მილიონ, არავაქცინირებულ ადამიანში იმდენივე ან მეტი თრომბოემბოლიური გართულებაა, ყოვეგვარი ვაქცინის გარეშე“, - განაცხადა თენგზიც ცერცვაძემ.