გურჯაანში ოჯახური კონფლიქტის დროს დაღუპული რვა თვის ჩვილის საქმეზე დაკავებულს ბრალი ოფიციალურად წარედგინა - ბრალი მას ყვარლის პოლიციის წინასწარი დაკავების იზოლატორში წარუდგინეს.
დაკავებულის ადვოკატის მინარი მურღვაშვილის ინფორმაციით, დაცვის მხარეს საქმის მასალები გადაეცა, თუმცა, მისივე თქმით, მამაკაცი წარდგენილ ბრალდებაში თავს დამნაშავედ არ ცნობს.
"ჩემი დაცვის ქვეშ მყოფს არ სურს ამ ამბის დეტალებზე საუბარი. რაც შეეხება ბრალს, პირველად მუხლს რამდენიმე დაემატა. შავლიაშვილი წარდგენილ ბრალში თავს დამნაშავედ არ ცნობს" , - ამბობს ადვოკატი.
შეგახსენებთ, მამაკაცმა გურჯაანში ცოლს ფიზიკური შეურაცხყოფა მიაყენა, 8 თვის შვილი კი, რომელიც ამ დროს დედას ხელში ეკავა, გონების დაკარგვის შემდეგ გარდაიცვალა. შინაგან საქმეთა სამინისტრომ მამაკაცი გუშინ დააკავა. მცირეწლოვანი ბავშვის გარდაცვალების მიზეზის დადგენის მიზნით დანიშნულია შესაბამისი ექსპერტიზები.
გამოძიება ზურაბ შავლიაშვილს სისხლის სამართლის კოდექსის 126', 116- ე 11', 19, 117- ე მუხლებით გათვალისწინებული დანაშაულის ჩადენას ედავება.
დაკავებულისთვის აღკვეთის ღონისძიების განსაზღვრის საკითხზე გურჯაანის სასამართლო 11 მარტს იმსჯელებს.
მასალის გამოყენების პირობები