რაგბის ფედერაციის პრეზიდენტის არჩევნებამდე ორი საათია დარჩენილი - "ექსპო ჯორჯიასთან", სადაც არჩევნები უნდა ჩატარდეს, პოლიციის უპრეცედენტოდ მაღალი მობილიზება შეინიშნება. მიზეზი ვეტერანი მორაგბეები არიან, რომლებიც ე.წ. სირცხვილის დერეფნის მოწყობას გეგმავენ.

მათი განცხადებით, სარაგბო სამყაროში მიმდინარე პროცესებში ხელისუფლება "ქირურგიული წესით" ჩაერია და დღევანდელ ყრილობაზე სახელისუფლო კანდიდატს იოსებ ტყემალაძეს აირჩევენ. ვეტერანი მორაგეები აცხადებენ, რომ არჩევნების შედეგებს არ აღიარებენ:

"სამარცხვინოა მორაგბეებს შორის ამხელა არმიის ჩაყენება, არ ვიცი, როგორ უნდა მივმართო, რა ვთქვა, მოსახლეობას მინდა მივმართო, რომ არაფერი არ მოხდება, ყველაფერი კარგად იქნება, ჩვენ ამ არჩევნებს არ ვაღიარებთ, იოსებ ტყემალაძეს ჩვენ ვეძახით იოსებ ბაღაფშს ან იოსებ არძინბას, რომელიც მოდის და ოკუპაციას უკეთებს ჩვენს ოჯახს, მასთან როგორ უნდა ვითანამშრომლოთ", - აცხადებს ვეტერანი მორაგბე ბობა კვინიხიძე.

ცნობისთვის, რაგბის ფედერაციის პრეზიდენტის არჩევნები განმეორებით ტარდება. პრეზიდენტობის ერთ-ერთ კანდიდატს იოსებ ტყემალაძეს მორაგბეთა უმრავლესობა უპირისპირდება. მათ ირაკლი აბუსერიძის მხარდასაჭერად 400 ხელმოწერა შეაგროვეს, თუმცა, უშედეგოდ.