ბათუმის მესამე პენიტენციურ დაწესებულებაში პატიმარმა თანამესაკნეს თავისა და კისრის არეში მძიმე დაზიანებები მიაყენა - ამის შესახებ ინფორმაციას სპეციალური პენიტენციური სამსახური ავრცელებს. დაშავებულს პირველადი სამედიცინო დახმარება პენიტენციური დაწესებულების მედპერსონალმა გაუწია, შემდეგ კი ის კლინიკაში გადაიყვანეს, სადაც გადაუდებელი ოპერაცია ჩაუტარდა.

როგორც განცხადებაშია ნათქვამი, შემთხვევა დღეს დილით მოხდა:

სპეციალური პენიტენციური სამსახურის განცხადებით, ბათუმში N3 პენიტენციურ დაწესებულებაში მსჯავრდებულმა თანამესაკნეს მძიმე დაზიანებები მიაყენა. უწყების ინფორმაციით, შემთხვევა დღეს, დაახლოებით 10:11 საათზე მოხდა.

"მსჯავრდებულმა ვ.ლ.-მ საკანში დახმარებისთვის დაუძახა პენიტენციური დაწესებულების თანამშრომლებს და უთხრა მათ, რომ მის თანამესაკნეს, ნ.ქ.-ს სამედიცინო დახმარება ესაჭიროებოდა. საკანში შესვლისას თანამშრომლებმა აღმოაჩინეს, რომ ვ.ლ.-ს ერთ-ერთი თანამესაკნეს (სულ საკანში სამი პატიმარი იყო), ნ.ქ.-ს თავისა და კისრის არეში დაზიანებები აღენიშნებოდა.

დაზიანება ნ.ქ.-ს სავარაუდოდ მისმა მესამე თანამესაკნე ვ.ა.-მ მიაყენა, თუმცა უნდა აღინიშნოს, რომ საკანში, სადაც მოცემული პირები იმყოფებოდნენ, 24-საათიანი ელექტრონულ-ვიზუალური მეთვალყურეობა ხორციელდება და დაზიანების მიყენებამდე თანამესაკნეებს შორის რაიმე სახის კონფლიქტს, ან დაპირისპირებას ადგილი არ ჰქონია. ამიტომ ვ.ა.-ს საქციელის მიზეზი გაურკვეველია", - ნათქვამია განცხადებაში.