ჯანდაცვის მინისტრის მოადგილის, თამარ გაბუნიას განცხადებით, ვაქცინაციის საბჭო მზად არის, გაითვალისწინოს არასამთავრობო სექტორის ის წინადადებები, რომელიც ანტიკორუფციული კუთხით იქნება შემოთავაზებული, რადგან კორუფციის რისკი ეპიდემიის პირობებში, მაღალია.

უწყებათაშორისი საკოორდინაციო საბჭოს სხდომის დასრულების შემდეგ გამართულ ბრიფინგზე თამარ გაბუნიამ აღნიშნა, რომ გარკვეული რისკებისგან თავის დაზღვევა მნიშვნელოვანია:

„ვაქცინაციის გეგმის მუშაობის პროცესი იყო ძალიან წარმომადგენლობითი. გეგმა არის ცოცხალი დოკუმენტი და მისი განახლება იგეგმებოდა თავიდანვე, რა თქმა უნდა, ჩვენ მზად ვართ გავითვალისწინოთ არასამთავრობო სექტორის წინადადებები თუ დამატებითი მექანიზმების გათვალისწინებას მიიჩნევენ მნიშვნელოვნად გეგმის ფარგლებში. ვაქცინაციის საბჭო, რომელიც ასევე წარმომადგენლობითი ორგანოა და იქ არიან როგორც სამთავრობო, ასევე არასამთავრობო სექტორის წამომადგენლები, მზად არის განიხილოს ის წინადადებები, რომელიც ანტიკორუფციული კუთხით იქნება შემოთავაზებული, რადგან კორუფციის რისკი ეპიდემიის პირობებში, როდესაც ბაზარზე დეფიციტი ვაქცინებთან მიმართებაში მაღალია და მე გუშინაც ვახსენე ის, რომ სამინისტრომ აქამდეც მიიღო გარკვეული შუამავლებისგან შემოთავაზებები, რომლებიც ვერ ადასტურებენ მათ კავშირს მომწოდებლებთან და რა თქმა უნდა, ასეთი რისკებისგან გადაზღვევა მნიშვნელოვანია და მზად ვართ ეს ნაწილი გავითვალისწინოთ“, - განაცხადა გაბუნიამ.