ეკონომიკის მინისტრის, ნათია თურნავას განცხადებით, არაა გამორიცხული , რომ რეგულაციების მოხსნამ ეპიდსიტუაცია გააუარესოს.

თურნამავ ხაზგასმით აღნიშნა, რომ თუ ბიზნესის წარმომადგენლებმა არ დაიცვეს პროტოკოლი კვლავ დააწესებენ შეზღუდვებს.

ამის შესახებ ეკომონიკის მინისტრმა საკოორდინაციო საბჭოს დასრულების შემდეგ გამართულ ბრიფინგზე ისაუბრა.

"ჩვენ გვქონდა ამაზე მსჯელობა, აბსოლუტურად ვიაზრებთ ამას და ვერ გამოვრიცხავთ, რომ მომავალში ასეთმა გახსნებმა გარკვეული გაუარესებაც გამოიწვიოს ეპიდვითარების, ეს რისკი ყოველთვის არსებობს. ამიტომ, ჩვენ ხაზს ვუსვამთ და პრემიერმაც ისაუბრა, რომ ეს არის ერთობლივი პასუხისმგებლობა.

ეს პასუხისმგებლობა უნდა გაიზიაროს ყველა იმ ბიზნესმა, რომელსაც ჩვენ ახლა ვხსნით, იმიტომ, რომ ეს არ არის უპირობო გადაწყვეტილება. ჩვენ ვიტოვებთ უფლებას, რომ თუკი დავინახეთ, მიუხედავად ჩვენი მკაცრი კონტროლისა და მოწოდებებისა, ადამიანებმა, მომხმარებლებმა, ვინც მივა რესტორანში, მოლში, ბაზრობაზე, ფიტნეს ცენტრში და ა.შ. აღარ დაიცვეს რეგულაციები, არ გამოიყენეს პირბადე ან სარესტორნო ბიზნესი არ ასრულებს სავალდებულო პროტოკოლებს, არ იცავს სავალდებულო ტესტირების მოთხოვნებს, ამთავითვე ვაფრთხილებთ, რომ ჩვენ მოგვიწევს კვლავ შეზღუდვების დაწესება". – ამბობს თურნავა.