საქართველოს მთავრობის საკოორდინაციო საბჭოს გადაწყვეტილებით, ქვეყანაში კორონავირუსთან დაკავშირებული რეგულაციების ნაწილი ხვალიდან ეტაპობრივად შემსუბუქდება, თუმცა ღარიბაშვილის მთავრობა კომენდანტის საათის გაუქმებაზე კატეგორიულ უარს ამბობს.

საკოორდინაციო საბჭოს გადაწყვეტილებით:

• სასტუმროები სამთო კურორტებზე გაიხსნება 25 თებერვლიდან, საბაგიროები - 8 მარტიდან;
• საქალაქთაშორისო ტრანსპორტი ამოქმედდება 25 თებერვლიდან;
• რესტორნები შიდა სივრცეებში ფუნქციონირებას განაახლებენ (შაბათ-კვირის გარდა) ბათუმში 1-ლი მარტიდან, ხოლო დანარჩენ საქართველოში 8 მარტიდან;
• კონფერენციები და ტრენინგები შესაბამისი პროტოკოლის დაცვით განახლდება 1-ლი მარტიდან;
• სპორტული დარბაზები ფუნქციონირებას განაახლებენ 15 მარტიდან რეგულაციების დაცვით;
• სკოლამდელი აღზრდის დაწესებულებები, როგორც საჯარო ისე კერძო, ფუნქციონირებას აღადგენენ 1-ლი მარტიდან (2 კვირაში ერთხელ თანამშრომლების 20%-ის სავალდებულო ტესტირების პირობით);
• უმაღლესი და პროფესიული სასწავლებლები პრაქტიკული, ლაბორატორიული საქმიანობის აღდგენას და გამოცდების არადისტანციურ ფორმატში ჩატარებას შეძლებენ 1-ლი მარტიდან, ხოლო სასწავლო პროცესის აუდიტორიებში აღდგენას 15 მარტიდან;
• სასკოლო წრეები განახლდება 15 მარტიდან;
• მუზეუმები და ბიბლიოთეკები საქმიანობას განაახლებენ 1-ლი მარტიდან;
• თეატრები, სპორტული კლუბები, პროფესიული ანსამბლები რეპეტიციების და ვარჯიშების განახლებას შეძლებენ 15 მარტიდან, ხოლო საქმიანობის სრულად აღდგენას - 1 აპრილიდან;
• არასასურსათო საცალო ვაჭრობა (მოლები და ბაზრობები) შაბათ-კვირის ჩათვლით მუშაობას განაახლებენ 8 მარტიდან.

ასევე შემსუბუქდა ქვეყანაში ვიზიტორებთან დაკავშირებით არსებუული რეგულაციებიც. ქვეყნების ჩამონათვალს, რომელთა მოქალაქეებს საქართველოს საჰაერო საზღვრის გავლით ქვეყნაში შემოსვლა შეუძლიათ PCR ტესტის ნეგატიური პასუხით, 1 მარტიდან დაემატება შემდეგი ქვეყნები: სომხეთი, აზერბაიჯანი, უკრაინა, ყაზახეთი, რუსეთი და ბელარუსი.