ევროპის ადამიანის უფლებათა სასამართლომ რუსი ოპოზიციონერის, ალექსეი ნავალნის , საქმის განხილვისას მისსავე სასარგებლოდ დროებითი ზომა გამოიყენა და კრემლს გათავისუფლებისკენ მოუწოდა - სასამართლომ გადაწყვეტილება 16 თებერვალს მიიღო.

"სასამართლო ალექსეი ნავალნის სასარგებლოდ დროებით ზომას მიმართავს და რუსეთის ხელისუფლებას ნავალნის გათავისუფლებისკენ მოუწოდებს", - ნათქვამია სასამართლოს გადაწყვეტილებაში.

გადაწყვეტილებას რუსეთის იუსტიციის მინისტრი ეხმაურება და აცხადებს, რომ სასამართლოს მოთხოვნა "არამიზნობრივი და უკანონოა" - მისივე განმარტებით, ნავალნის პატიმრობიდან გათავისუფლების "არანაირი სამართლებრივი საფუძველი არ არსებობს".

ცნობისთვის, მოსკოვის სასამართლომ 2 თებერვალს დააკმაყოფილა ბრალდების მოთხოვნა და "ივ როშეს" საქმეზე ალექსეი ნავალნის პირობითი მსჯავრი რეალური პატიმრობით შეცვალა, რის შედეგადაც ნავალნის სამი წლითა და ექვსი თვით თავისუფლების აღკვეთა შეუფარდა.

შეგახსნებთ, რომ ალექსეი ნავალნი მოსკოვში ჩასვლისთანავე, საპასპორტო კონტროლის გავლის დროს, 17 იანვარს, პოლიციამ აიყვანა.