საქართველოს ფინანსთა სამინისტრო საგამოძიებო სამსახურმა სამსახურეობრივი გულგრილობის ფაქტზე ხუთი საჯარო მოხელე ამხილა. საქმე ეხება გზის სარეაბილიტაციო სამუშაოების დროს დაკისრებული მოვალეობების არაჯეროვნად შესრულებას. როგორც უწყების მიერ გავრცელებულ განცხადებაში ნათქვამი, ორი მათგანი საჯარო სამსახურის ყოფილი, ხოლო სამი - მოქმედი თანამშრომელია:

"გამოძიებით დადგინდა, რომ გასულ წლებში, იმერეთის რეგიონში განხორციელდა გზის სარეაბილიტაციო სამუშაოები, რომლის ზედამხედველობა და მიღება დაევალა ერთ-ერთი მუნიციპალიტეტის შესაბამის კომისიას.

ბრალდებულების მიერ, რომლებიც იყვნენ ამ კომისიის წევრები, არაჯეროვნად განხორციელდა დაკისრებული მოვალეობები, რამაც გამოიწვია სახელმწიფოს კანონიერი ინტერესების არსებითი დარღვევა. კერძოდ, დანაშაულში მხილებულ პირთა მხრიდან გამოჩენილი სამსახურებრივი გულგრილობის შედეგად, კონტრაქტორმა კომპანიამ შეასრულა ნაკლები მოცულობის სამუშაოები, ვიდრე ეს ხელშეკრულებით იყო გათვალისწინებული", - წერია უწყების განცხადებაში.

გამოძიება საქართველოს სისხლის სამართლის კოდექსის 342-ე მუხლის პირველი ნაწილით მიმდინარეობს, რაც 3 წლამდე თავისუფლების აღკვეთას ითვალისწინებს.