ამერიკის ახლადარჩეულმა პრეზიდენტმა, ჯო ბაიდენმა და რუსეთის ლიდერმა, ვლადიმერ პუტინმა სამშაბათს ტელეფონით ისაუბრეს- ეს პირველი ზარია ბაიდენის გაპრეზიდენტების შემდეგ, ამის შესახებ ინფორმაციას თეთრ სახლზე დაყრდნობით Nbcnews-ი ავრცელებს.

„პრეზიდენტმა ბაიდენმა გარკვევით აღნიშნა, რომ ამერიკის შეერთებული შტატები თავისი ინტერესების დასაცავად მტკიცედ იმოქმედებს რუსეთის ქმედებების საწინააღმდეგოდ, რომელიც გვაზიანებს ჩვენ და ჩვენს მოკავშირეებს“ - ნათქვამია თეთრი სახლის განცხადებაში. ლიდერებმა ისაუბრეს აგრეთვე სტრატეგიული შეიარაღების შემცირების ხელშეკრულების ვადის 5 წლით გახანგრძლივებაზე, რომელსაც ხელი 5 თებერვალს უნდა მოეწეროს.

ჯო ბაიდენმა თავის საუბარში კიდევ ერთხელ დაადასტურა თავისი მხარდაჭერა უკრაინის სუვერენიტეტის მიმართ. ამერიკის პრეზიდენტმა საუბრის განმავლობაში ახსენა აგრეთვე Solar winds-ზე განხორციელებული კიბერ შეტევა, რომელიც დაკავშირებულია რუსეთის მაღალჩინოსნებთან , აგრეთვე ხაზგასმით აღნიშნა რუსეთის მიერ ავღანეთში დაწესებული ჯილდოების შესახებ ამერიკელი ჯარისკაცების მკვლელობის სანაცვლოდ. იგი აგრეთვე შეეხო 2020 წლის არჩევნებში ჩარევის მცდელობასა და რუსი ოპოზიციონერი ლიდერის, ალექსეი ნავალნის მოწამვლის ფაქტს.