ფეხბურთელ გიორგი შაქარაშვილის მკვლელობაში ბრალდებული მორაგბის არჩილ გაგნიძის ადვოკატის ბექა ნემსიწვერიძის განცხადებით, მოკლულის მეგობარი გურამ ამირხანაშვილი მკვლელობის თვითმხილველი არ არის.

როგორც ნემსიწვერიძე განმარტავს, ამირხანაშვილმა დაკითხვის დროს რამდენჯერმე მიუთითა ურთიერთგამომრიცხავ გარემოებებზე.

„რა ლოგიკას ეფუძნება ბრალდების მხარე, არ ვიცი, როცა საუბრობს, რომ გურამ ამირხანაშვილი პირდაპირი მოწმეა. გურამ ამირხანაშვილს არაფერი დაუნახავს და არაფერი გაუგონია, განსაკუთრებით, მკვლელობის ეპიზოდთან დაკავშირებით. საინტერესოა, როგორ შეიძლება ის პირდაპირი მოწმე იყოს, თუმცა, ვნახავთ, რა ინფორმაციას მიაწვდის სასამართლოს და ამის შემდეგ შევძლებთ მსჯელობას. იქიდან გამომდინარე, რომ მან გამიკითხვისას რამდენჯერმე მიუთითა ურთიერთგამომრიცხავ გარემოებებზე, მისი ჩვენება ჩვენი შეფასებით, სასამართლოსთვის ნაკლებად სანდო უნდა იყოს", - განაცხადა ნემსიწვერიძემ.

აღსანიშნავია, რომ შაქარაშვილის მეგობარს გურამ ამირხანაშვილს, რომელიც ტრაგიკულ ღამეს ფეხბურთელთან ერთად იმყოფებოდა წვეულებაზე, გამოძიებისთვის ხუთი ჩვენება აქვს მიცემული. ადვოკატების განცხადებით, გურამ ამირხანაშვილს ბოლო, მეზუთე ჩვენება რადიკალურადაა შეცვლილი.