სასტიკი მკვლელობა თელავში - პოლიციამ 29 წლის ქალის მკვლელობისა და 37 წლის მამაკაცის მკვლელობის მცდელობის ბრალდებით 49 წლის პირი დააკავა. შემთხვევა გვიან ღამით სოფელ კისისხევში მოხდა. ადგილობრივების განმარტებით, სამივე მათგანი ერთ სუფრაზე იმყოფებოდა.
შემზარავი შემთხვევის შედეგად ქალი ადგილზე გარდაიცვალა, ხოლო მამაკაცი სასწრაფო დახმარების ბრიგადამ საავადმყოფოში გადაიყვანა, სადაც გადაუდებელი ოპერაცია ჩაუტარდა. ამ დროისთვის მისი მდგომარეობა სტაბილურად მძიმეა.
როგორც შსს-ს მიერ გავრცელებუ განცხადებაშია ნათქვამი, დანაშაული ურთიერთშელაპარაკების ნიადაგზე მოხდა:
"შინაგან საქმეთა სამინისტროს კახეთის პოლიციის დეპარტამენტის თანამშრომლებმა ცხელ კვალზე ჩატარებული ოპერატიული და საგამოძიებო ღონისძიებების შედეგად თელავის მუნიციპალიტეტის სოფელ კისისხევში დამამძიმებელ გარემოებაში განზრახ მკვლელობის ბრალდებით 1972 წელს დაბადებული ჯ.ა. დააკავეს.
დანაშაული 16-დან 20 წლამდე ან უვადო თავისუფლების აღკვეთას ითვალისწინებს.
გამოძიებით დადგინდა, რომ ჯ.ა.-მ ურთიერთშელაპარაკების შემდეგ თავის ნაცნობ მამაკაცს - 1984 წელს დაბადებულ ხ.ე.-ს და ამ უკანასკნელის თანმხლებ ქალს - 1992 წელს დაბადებულ დ.ფ.-ს არაერთი ჭრილობა მიაყენა. დაჭრილი მამაკაცი გადაყვანილია სამედიცინო დაწესებულებაში, დაშავებული ქალი კი მიღებული ჭრილობების შედეგად შემთხვევის ადგილზე გარდაიცვალა.
სამართალდამცველებმა ბრალდებული მომხდარიდან მალევე ცხელ კვალზე დააკავეს. პოლიციამ დანაშაულის ჩადენის იარაღი - დანა ნივთმტკიცების სახით ამოიღო. დაკავებული აღიარებს ჩადენილ დანაშაულს.
აღნიშნულ ფაქტზე გამოძიება საქართველოს სისხლის სამართლის კოდექსის 108-ე მუხლით და 19-109-ე მუხლის მე-3 ნაწილის „ა“ ქვეპუნქტით მიმდინარეობს" - ნათქვამია განცხადებაში.
მასალის გამოყენების პირობები