შოტლანდიელმა მეცნიერებმა განაცხადეს, რომ ისინი უნიკალური აღმოჩენის წინაშე არიან- იპოვეს ცენტრალური ნერვული სისტემის დაავადებათა პოტენციური მკურნალობის გზები. მათი თქმით, ახალი აღმოჩენის შესაბამისად, შესაძლებელი იქნება დეგენერაციული დაავადების ფონზე დაზიანებული ნერვების აღდგენა.

ედინბურგის უნივერსიტეტის მეცნიერებმა ACTA NEUROPATHOLOGIA-ს ჟურნალში ამ თვეში გამოაქვეყნეს თავიანთი კვლევა, სადაც აცხადებენ, რომ დაზიანებული ნერვული უჯრედების აღდგენა შესაძლებელია თუ მიტოქონდრიის უჯრედებში ენერგიის დონე გაუმჯობესდება, რაც შემდგომ მოქმედებაში მოყვანილ მამოძრავებელ ნერვულ უჯრედთა მდგომარეობას გამოასწორებს და პოტენციურად სასიკვდილო მდგომარეობიდან გამოჯანმრთელება მოხდება.

კვლევის წამყვანმა მეცნიერ-დირექტორმა, არფან მეტამ განაცხადა, რომ გუნდის მუშაობა იძლევა იმედს, რომ უჯრედის ენერგიის წყაროს აღდგენით შესაძლებელი იქნება აქსონების- ნეირონის წაგრძელებული ბოჭკოების დაცვა და მათი კონტაქტის შენარჩუნება კუნთებთან, რათა არ მოხდეს გადაგვარების პროცესი.

ზემოხსენებული კვლევა კარს უღებს კლინიკურ ცდებს და იმ შემთხვევაში თუ განმეორებით ჩატარებულ ცდებშიც ანალოგიური შედეგი მიიღება, ეს მეცნიერებს მისცემს შესაძლებლობას, იპოვონ შესაბამისი წამლები, რომლებსაც მომავალში ადამიანებზე ექსპერიმენტულ კვლევებში გამოიყენებენ. „უკვე მიმდინარეობს სამუშაოები არსებული ლიცენზირებული წამლების იდენტიფიკაციისთვის, რომლებსაც შეეძლებათ მიტოქონდიირს გაძლიერება და ცენტრალური ნერვული სისტემის აღდგენა“ - განაცხადა მეტამ.

შეგახსენებთ, რომ ცენტრალური ნერვული სისტემის დაავადება ამ ეტაპზე უნკურნებელია, მიუხედავად ამისა არსებობს მკურნალობის კურსები, რომელიც ადამიანებს სიმპტომების მართვაში ეხმარება. დაავადება პროგრესირების კვალდაკვალ იწვევს კუნთების დასუსტებას, რაც მოგვიანებით განაპირობებს დამოუკიდებლად გადაადგილების შეუძლებლობას. პაციენტმა სხვადასხვა სიმპტომებთან ერთად შესაძლოა ლაპარაკის უნარიც კი დაკარგოს.