ჯანდაცვის მინისტრის მოადგილის თამარ გაბუნიას განმარტებით, კორონავირუსის საწინააღმდეგო ვაქცინის გვერდითი რეაქციების მონიტორინგი და მართვა უნდა განხორციელდეს საერთაშორისო პრაქტიკასთან შესაბამისობაში. მისი თქმით, ქვეყანაში ვაქცინის დანერგვის გეგმაზე 80-ზე მეტი ექსპერტი მუშაობდა:

"ეს ითვალისწინებს ცივი ჯაჭვის მოთხოვნების შესრულების შესაძლებლობებს, ასევე მარეგულირებელ გარემოს, რა თქმა უნდა, ვაქცინაციის პროგრამასთან დაკავშირებულ უსაფრთხოების საკითხებს, რადგან გვერდითი რეაქციების მონიტორინგი და მართვა უნდა განხორციელდეს აუცილებლად საერთაშორისო პრაქტიკასთან შესაბამისობაში. დღეს ეს პროცესი უკვე დასრულებულია და ახლა, რა თქმა უნდა, ძალიან მნიშვნელოვანია ის, რომ გეგმის შესრულება დავიწყოთ, როგორც კი ვაქცინა იქნება ხელმისაწვდომი და ესეც, ვფიქრობთ, რომ პირველივე კვარტალში შესაძლებელი გახდება და იყოს მზაობა, როგორც სამინისტროს სტრუქტურების ფარგლებში, ასევე ადგილობრივი მუნიციპალიტეტების ფარგლებში და რაც მთავარია, სამედიცინო დაწესებულებების დონეზე," - განაცხადა თამარ გაბუნიამ.