პენიტენციური ჯანდაცვის სფეროში გაწეული დახმარებისთვის ნოდარ ხადური დაჯილდოვდა

ბიზნესი & ეკონომიკა - 11:28, 04 Dec, 2013

2598

საქართველოს ფინანსთა მინისტრს, ნოდარ ხადურს პენიტენციური ჯანდაცვის სფეროში გაწეული დახმარებისთვის სიმბოლური ჯილდო გადაეცა. ინფორმაციას ხადურის უწყების პრესსამსახური ავრცელებს.
მიმდინარე წლის 3 დეკემბერს, საქართველოს ფინანსთა მინისტრი ნოდარ ხადური დაესწრო საქართველოს სასჯელაღსრულების, პრობაციისა და იურიდიული დახმარების საკითხთა სამინისტროს ინიციატივითა და ევროკავშირისა და ევროპის საბჭოს ერთობლივი პროექტის მხარდაჭერით ორგანიზებულ კონფერენციას სახელწოდებით „პენიტენციური ჯანდაცვის რეფორმა საქართველოში - ვასრულებთ დაპირებას“.

კონფერენციაზე სასჯელაღსრულების სამინისტროს წარმომადგენლებმა საზოგადოებას წარუდგინეს ანგარიში პენიტენციური ჯანდაცვის სფეროში 2013 წლის განმავლობაში მიღწეულ ცვლილებებზე, გამოწვევებზე და სამომავლო გეგმებზე. აღსანიშნავია, რომ 2013 წელს პენიტენციური ჯანდაცვის ბიუჯეტი 7-დან 12 მილიონ ლარამდე გაიზარდა.
ღონისძიებას საპატიო სტუმრის სტატუსით დაესწრო ადამიანის უფლებების საკითხებში ევროკავშირის სპეციალური წარმომადგენელი, ბ-ნი თომას ჰამერბერგი. კონფერენციაზე პენიტენციური ჯანდაცვის სფეროში გაწეული დახმარებისთვის დაჯილდევდნენ აღმასრულებელი ხელისუფლებისა და არასამთავრობო და დონორი ორგანიზაციების წარმომადგენლები, ჟურნალისტები, ექიმები.
საქართველოს ფინანსთა მინისტრს, ნოდარ ხადურს პენიტენციური ჯანდაცვის სფეროში გაწეული დახმარებისთვის სიმბოლური ჯილდო გადაეცა.