დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელის განცხადებით, წერტილოვანი შეზღუდვების პირველ თებერვლამდე შენარჩუნების გადაწყვეტილება, ქვეყანაში შექმნილ ეპიდვითარებას ეფუძნება.

იგი მიიჩნევს, რომ ნებისმიერი შეზღუდვის მოხსნა და ადამიანთა გადაადგილების გააქტიურება შემთხვევის მატებასთან აუცილებლად იქნება დაკავშირებული.

“შესაბამისად, ნებისმიერი შეზღუდვების მოხსნა უნდა მოხდეს ფრთხილად, დაკვირვებით და თანმიმდევრულად ნელ-ნელა. აქ საუბარია ბიზნესის სათანადო მზაობაზე, რათა გახსნის შემთხვევაში მათ შეინარჩუნონ მდგრადობა და შეამცირონ რისკები მათი მოქმედების არეალში.

ეს არის ქვეყნის გადაწყვეტილება, რომელიც ეფუძნება იმ ეპიდსიტუაციას, რაც გვაქვს ქვეყანაში. თუ ჩვენ გვინდა, რომ მდგრადად შევინარჩუნოთ დღეს უკვე ასე ვთქვათ გამოჩენილი კოვიდის შემთხვევების კლების ტენდენცია უნდა მივყვეთ ამ რეკომენდაციებს“, – განაცხადა ზახაშვილმა.