რუსეთზე ზეწოლის ახალი წერტილი - ბაიდენის პირველი ნაბიჯი: აშშ-ის უსაფრთხოების საბჭოში რუსეთზე მიმართული სპეციალური სტრუქტურა იქმნება

მსოფლიო - 02:04, 11 Jan, 2021

4328

აშშ-ის არჩეული პრეზიდენტი ჯო ბაიდენი ხელისუფლებაში მოსვლისთანავე ამერიკის ეროვნული უსაფრთხოების საბჭოს რეფორმირებას აპირებს. კერძოდ, მასში გამოიყოფა სპეციალური სტრუქტურა, რომელიც რუსეთისა და ცენტრალური აზიის რესპუბლიკების საკითხებით იქნება დაკავებული.

უცხოურ მედიაში ვრცელდება ინფორმაცია, რომ ამ განყოფილებას აშშ-ის სპეცსამსახურების ყოფილი წარმომადგენელი ანდრეა კენდალ-ტეილორი უხელმძღვანელებს.

ვინ არის ანდრეა კენდალ-ტეილორი:

კენდალ-ტეილორის მოღვაწეობაში რუსეთის საკითხებს უპირველესი ადგილი უკავია. იგი ამ დრომდე "ახალი ამერიკული უსაფრთხოების ცენტრში (CNAS) ტრანსატლანტიკური უსაფრთხოების პროგრამის დირექტორი იყო. ამ პროგრამაში ის სწავლობდა სხვადასხვა საფრთხეებს, რომელიც აშშ-სა და ევროპას ემუქრებოდა რუსეთის მხრიდან. რამდენიმე წლის წინ კი იყო აშშ-ის ცენტრალური სადაზვერვო სამმართველოს (CIA) მთავარი ანალიტიკოსი და იკვლევდა ავტოკრატიის ბუნებასა და რუსეთში მიმდინარე პოლიტიკურ პროცესებს.

შესაბამისად ეს რეფორმა და უსაფრთხოების საბჭოში რუსეთისა და ცენმტრალური აზიის რესპუბლიკების საკითხების წინ წამოწევა აშკარად მიუთითებს ახალი პრეზიდენტის საგარეო პოლიტიკურ პრიორიტეტებზე.

აღსანიშნავია ისიც, რომ უშიშროების საბჭოში ჯორჯ ბუშისა და ბარაკ ობამას დროს რუსეთის მიმართულებას ასევე ცალკე სტრუქტურა კურირებდა, რომელიც ტრამპმა გააუქმა და ევროპის მიმართულებას შეუერთა.

საინტერესოა ის ფაქტიც, რომ უშიშროების საკითხებში მრჩევლად ბაიდენი ჯეკ სალივანის დანიშვნას აპირებს და ექსპერტების აზრით, უშიშროების საბჭოს სტრუქტურის რეფორმაც სწორედ სალივანს ეკუთვნის.