მეუფეების ნაწილი, რომელიც 4 იანვარს პატრიარქის იუბილეს დაესწრო და კონტაქტი ჰქონდა კოვიდინფიცირებულ შორენა თეთრუაშვილთან, თვითიზოლაციაში ყოფნის ნაცვლად, ღვთისმსახურებას განაგრძობს.

როგორც სასულიერო პირები აცხადებენ, მათ თვითიზოლაციის წესების დაცვის შესახებ შეტყობინება არ მიუღიათ.

"საგანგებო შეტყობინება თვითიზოლაციაზე და სიფრთხილის დაცვაზე არ ყოფილა... რეკომენდაციები რაიმე დამატებითი არ ყოფილა", - განაცხადა ალავერდელმა მიტროპოლიტმა დავითმა.

ახალქალაქის, კუმურდოს და კარის მიტროპოლიტის ნიკოლოზის განცხადებით, მას კორონავირუსი სამი თვის წინ ჰქონდა, ამიტომ ტესტირება საჭირო აღარ გახდა:

"ვიყავი და უარი მითხრეს ტესტის აღებაზე. მიზეზად დაასახელეს, რომ ვისაც გადატანილი აქვს 3 თვის განმავლობაში აღარ უღებენ ტესტს", - აღნიშნა მეუფემ.

ცნობისთვის, დღეს საპატრიარქოში დაავადებათა კონტროლის ეროვნული ცენტრის წარმომადგენლები მივიდნენ და 55 პირს PCR ტესტი უკვე ჩაუტარეს. ახლა ყველა მათგანი საკარანტინე სივრცეში იმყოფება.

რაც შეეხება პატრიარქს, ამ ეტაპზე მასთან ტესტირების ჩატარება არ იგეგმება.