დაავადებათა კონტროლის ეროვნული ცენტრის ხელმძღვანელის მოადგილემ, პაატა იმნაძემ განაცხადა, რომ საქართველოში კორონავირუსის ახალი შტამის სამი საეჭვო შემთხვევიდან ორი არ დადასტურდა, ხოლო ერთს ამ დრომდე იკვლევენ.

იმნაძის განმარტებით, ახალი შტამი უფრო ადვილად ვრცელდება, მაგრამ სიმძიმით არსებული შტამისგან არ განსხვავდება.

"ახალი შტამი... სამი იყო საეჭვო. აქედან ორი უარყოფითია, არ დადასტურდა. ერთის კვლევა კიდევ მიმდინარეობს და ხვალისათვის უკვე იქნება ცნობილი. ახალი შტამი ყველგან არის, სხვადასხვა სახელები ქვია. საბედნიეროდ, ახალ შტამს სიმძიმე არ მომატებია. ახალი შტამი უფრო ადვილად ვრცელდება, უფრო ადვილად აღწევს ადამიანის უჯრედში, უფრო გადამდებია, მაგრამ სიმძიმით არ განსხვავდება უკვე არსებული შტამებისგან", - აცხადებს იმნაძე "ტვ პირველის" ეთერში.

შეგახსენებთ, რომ კორონავირუსის ახალი შტამი დიდ ბრიტანეთში რამდენიმე კვირის წინ გამოჩნდა. ის უკვე გამოვლინდა ევროპის 8 ქვეყანაში.