როგორც ირკვევა, ე.წ. დიდუბის საძმო სასაფლაოზე კრიმინალური ავტორიტეტის დაბადების დღეზე იყო შეკრებილი, როდესაც ერთ-ერთმა მამაკაცმა იარაღიდან ორ ადამიანს ესროლა.
ერთ-ერთი ვერსიით, დაჭრა წარსულში არსებულ დაპირიპირებას უკავშირდება.
როგორც "ნიუპოსტმა" გაარკვია, სასაფლაოზე 20-მდე ახალგაზრდა იმყოფებოდა, ადილობრივებმა კი 4 გასროლის ხმა გაიგეს.
როგორც "ნიუპოსტს" უყვებიან, სროლა ორმხრივი არ ყოფილა. მამაკაცმა ორი ადამიანის დაჭრის შემდეგ ტერიტორია სავარაუდოდ ავტომობილით დატოვა და მიიმალა.
ჩვენთვის მოწოდებული ინფორმაციის თანახმად, დაჭრას წინ ურთიერთშელაპარაკება უძღოდა. ჩხუბი სასაფლაოზე შეკრებიდან დაახლოებით ერთ საათში დაიწყო.
ერთ-ერთი დაჭრილი ახალგაზრდა მამაკაცის მდგომარეობა მძიმეა. დაშავებულები ღუდუშაურის სახელობის კლინიკაში არიან მოთავსებული.
ვაშლიჯვირს პოლიციაში გუშინ მთელი ღამის განმავლობაში კითხავდნან თვითმხილველებს. საგამოძიებო მოქმედებები ჩატარდა სასაფლაოზეც სადაც დაჭრა მოხდა.
რაც შეეხება გიორგი დიდუბსკის, ვის საფლავზეც მოხდა კრიმინალური ფაქტი, ის 6 წლის წინ ნეაპოლში მისივე საცხოვრებელ ბინაში მოკლეს.
26 წლის გიორგი ბურდული სნაიპერის მიერ, ფანჯრიდან ნასროლ ტყვიას ემსხვერპლა. ტყვია მას თავში მოხვდა.
ცნობილია, რომ ბურდული 2013 წლის ივნისში საბერძნეთში ,,მოინათლა".
მასთან ერთად ქურდული სამყაროს ლიდერის ხარისხში აიყვანეს კიდევ ექვსი პირი. ესენი არიან: ,,ისლამ დიდი", ,,პაატა სამტრედიისკი", ,,მამუკა ჩიჩხინა", ,,ირაკლი კემე", ,,ნოდო გლდანსკი", ზურიკო და აბე. მათი ,,ნათლიმამები" იყვნენ ვაჟა ბიგანიშვილი, ,,გია სამტრედიისკი", ,,ჩირო გალსკი" და ,,გოჯა ბაკინსკი".
ეს უკანასკნელი, ,,ნათლობის ცერემონიალიდან" ორ თვეში თურქეთის ქალაქ სტამბულში მხეცურად მოკლეს.
,,პრაიმ კრაიმის" წყაროებით, გიგა ბურდული ბოლო დროს იტალიის ქალაქ ნეაპოლში ,,კანონიერ ქურდებთან" ,,ბაქსიორა," კაკო ლანდიასა და ,,სინკარასთან" ერთად ცხოვრობდა.
მისი მკვლელობის მცდელობის ერთ-ერთ მოტივად კრიმინალურ კლანებთან კონფლიქტი სახელდება.
ავტორი: დავით ჯაბაშვილი
მასალის გამოყენების პირობები