რუსული მედიის ინფორმაციით, ქვეყნის საგარეო საქმეთა სამინისტროს ცენტრალური შენობიდან 1 მილიონი დოლარი მოიპარეს. ქურდობა გასული წლის მიწურულს მოხდა, თუმცა, დანაშაულის დეტალები მედიისთვის მხოლოდ ახლა გახდა ცნობილი.

“Рен-ТВ”-ის ინფორმაციით, ეს თანხა იყო ნაწილი ირანის მიერ საკონსულო მომსახურეობისათვის რუსეთის საგარეო უწყებისათვის გადახდილი თანხისა, რაც ჯამში მილიონნახევარ დოლარს შეადგენდა.

ფული მოსკოვში დიპლომატიური ფოსტით ჩაიტანეს, ხოლო საგარეო უწყების შენობაში ის არაყი "Absolut"-ის ორ ყუთში იყო მოთავსებული, რომელთაც ქარალდის პაკეტი ჰქონდა შემოხვეული და რუსეთის სახელმწიფო გერბით იყო დაბეჭდილი.

ორივე ყუთი 2019 წლის 29 ნოემბერს საგარეო უწყების სავალუტო-საფინანსო დეპარტამენტის წამყვანი სპეციალისტის ნატალია აგალცოვას კაბინეტშ შეიტანეს.

თანხის დაკარგვა 16-19 დეკემბრის პერიოდში მოხდა. სარევიზიო ჯგუფმა აღმოაჩინა, რომ დანაკლისი 1 066 638 დოლარს შეადგენდა. აგალცოვა დააკავეს და დაკითხეს. მან ჩვენებაში აღნიშნა, რომ ქურდობის ფაქტი მაშინ აღმოაჩინა, როდესაც დაუკითხავად გახსნა არყის ყუთი.

მისი თქმით, ერთერთ ყუთში კუპიურები მხოლოდ ყუთის ზედაპირზე ეწყო, ხოლო დანარჩენი ყალბი ერთდოლარიანი კუპიურებით იყო სავსე.

პანიკაში ჩავარდნილმა აგალცოვამ გადაწყვიტა დანაკლისი თავად აენაზღაურებინა - ნაწილი მან სალაროდან აიღო, ხოლო 200 ათასი დოლარი და 3 მილიონი რუბლი საბანკო კრედიტი აეღო. ბანკმა მას კრედიტზე უარი უთხრა, რის შემდეგაც მან თვითმკვლელობა სცადა.

აგალცოვა 2020 წლის აგვისტოს შემდეგ წინასწარი დაკავების იზოლატორში იმყოფებოდა, ახლა კი შინაპატიმრობაშია.

დაკავებულია ასევე აგალცოვას საყვარელი, რომელიც საქმეში მოწმის სტატუსით ფიგურირებს.

დაკარგული თანხა ჯერჯერობით ვერ აღმოაჩინეს.