ინფრასტრუქტურის მინისტრობის კანდიდატის მაია ცქიტიშვილის განცხადებით, გადაწყვეტილება 24 დეკემბრიდან შეზღუდვების შემსუბუქებასთან დაკავშირებით მთავრობას ჯერ არ მიუღია.

მაია ცქიტიშვილის ინფორმაციით, გადაწყვეტილება საქალაქთაშორისო და საზოგადოებრივი ტრანსპორტის აღდგენასთან დაკავშირებით მიღებული არ არის, თუმცა, მისი ვარაუდით, არსებული შეზღუდვები ძალაში დარჩება.

"ამ თემასთან დაკავშირებითაც საბოლოო გადაწყვეტილებას ვერ გეტყვით. ამერიკული ინსტიტუტის მონაცემებით, რომელსაც ვეყრდნობით, მობილური ტელეფონების მომხმარებლების გადაადგილების სტატისტიკის მიხედვით, დაფიქსირებულია მობილობის მკვეთრი შემცირება საქართველოში. ისეთი მკვეთრი არა, როგორც ჩვენ გვინდა, მაგრამ 40%-იანი შემცირება გვაქვს. დიდწილად, ეს არის ტრანსპორტის და გადაადგილების შეზღუდვის გამო. შესაბამისად, რადგან ტრანსპორტის ფუნქციონირება პირდაპირ არაა დაკავშირებული ბიზნესაქტივობასთან, შეიძლება ტრანსპორტი იყოს ის შეზღუდვა, რომელიც შეიძლება ნაკლებად მტკივნეული შესანარჩუნებელი იყოს,"- განაცხადა მაია ცქიტიშვილმა "დღის კურიერში".