"ჩემი შვილი ჯანმრთელი იყო...40-ზე მაღალი ჰქონდა სიცხე...ერთი აბი მომცეს, სიცხე არ მიწევს და ვეხვეწები ექიმებს რომ მეორეც დამიმატონო" - 35 წლის გარდაცვლილის ოჯახი ჯანდაცვის სისტემას ადანაშაულებს

COVID-19 - 22:54, 18 Dec, 2020

1826

კორონავირუსით გარდაცვლილი 35 წლის გიორგი მიმინოშვილის ოჯახი ახალგაზრდა მამაკაცის გარდაცვალების მთავარ მიზეზად ექიმების გულრგილობასა და უყურადღებობას ასახელებს.

გიორგი მიმინოშვილი კოვიდსასტუმროში პირველად 11 დეკემბერს მივიდა. მიუხედავად იმისა, რომ მას თანმხლები დაავადებები არ ჰქონდა, ახალგაზრდა პაციენტის ჯანმრთელობის მდგომარეობა 5 დღის შემდეგ დამძიმდა, რის გამოც, ინფიცირებული რუხის საავადმყოფოში მოათავსეს. 8 დღიანი უშედეგო მკურანლობის შემდეგ მიმინოშვილი დღეს, 18 დეკემბრის გამთენიისას გარდაიცვალა.

"ჩემი შვილი ჯანმრთელი იყო", - ყვება ფორმულასთან გარდაცვლილის დედა, რომელიც შვილის გარდაცვალებას არასათანადო, დაგვიანებულ მკურნალობას უკავშირებს, - ვფიქრობდი, ამას რა მოერევა მეთქი".

გარდაცვლილის ოჯახის ცნობით, ახალგაზრდა მამაკაცს ჯერ მკურნალმა ექიმმა დაუწყო შეუსაბამო დანიშნულებით მკურნალობა. მიუხედავად იმისა, რომ პაციენტს მაღალი სიცხეები და ფილტვების ანთება აღენიშნებოდა, ექიმმა ის კორონავირუსის ტესტის გასაკეთებლად არ გადაამისამართა და მას ანტიბიოტიკები გამოუწერა.

კორონავირუსი მიმინოშვილს მხოლოდ კვარიათის კოვიდსასტუმროში მისვლის შემდეგ დაუდასტურდა. იქ მოახერხა პაციენტმა პირველად ვირუსზე შემოწმება.

"კოვიდსასტუმროში გადაღება ვერ გაუკეთეს ორი დღე", - ყვება გარდაცვლილის მეუღლე .

გარდაცვლილის მეუღლის ცნობით, ახალგაზრდა მამაკაცს კოვიდსასტუმროში არასათანადოდ მკურნალობდნენ, გადაუდებელი პროცედურების უზრუნველყოფას კი მნიშვნელოვნად აგვიანებდნენ.

"40-ზე მაღალი ჰქონდა სიცხე...ერთი აბი მომცესო და სიცხე არ მიწევსო და ვეხვეწები ექიმებს რომ მეორეც დამიმატონო". - ყვება იი.

გარდაცვლილის ოჯახი დარწმუნებულია, რომ დროული და ადეკვატური დიაგნოზის, შემდეგ კი, სათანადო მკურნალობის პირობებში გიორგი ნონიაშვილი გადარჩებოდა.