ამ ეტაპისთვის სტაბილური მდგომარეობაა, თუმცა "შავი პარასკევის" შედეგები ჯერ არ დამდგარა და ის წინ გვაქვს

ამ ეტაპისთვის სტაბილური მდგომარეობაა, თუმცა "შავი პარასკევის" შედეგები ჯერ არ დამდგარა და ის წინ გვაქვს - ტიკარაძე

COVID-19 - 13:41, 10 Dec, 2020

1226

ჯანდაცვის მინისტრმა ეკატერინე ტიკარაძემ უწყებაში გამართულ ბრიფინგზე ქვეყანაში არსებულ პანდემიურ მდგომარეობასა და შეზღუდვების მოხსნის შესახებ ისაუბრა. როგორც ტიკარაძემ აღნიშნა, "შავი პარასკევის" შედეგები ჯერ არ დამდგარა და ყველაფერი წინ არის, თუმცა, ამ ეტაპზე, ინფექციის გავრცელების კუთხით სტაბილურობა შეინიშნება:

„მნიშვნელოვანია აღინიშნოს, რომ ამ ეტაპისთვის გვაქვს სტაბილური მაჩვენებელი, ინფიცირებულთა რიცხვი 4500-ს არ აღემატება. ეს არის 1 კვირის მანძილზე რასაც ჩვენ ვაკვირდებით.

ჩვენ ჯერ არ გვაქვს მიღებული „შავი პარასკევის“ ეფექტი, რომელიც იცით თუ რეალურად რამდენად დრამატულად იყო ასახული, ამის შედეგებს ჩვენ ჯერ კიდევ მოვიმკით. აქედან გამომდინარე, ნაადრევია იმაზე საუბარი, თუ როგორი იქნება შეზღუდვების მოხსნა, ვინაიდან ჯერჯერობით ვსაჭიროებთ იმას, რომ ეპიდემიოლოგებმა გაანალიზონ ის მომდევნო ტალღა, რომელიც შესაძლოა მოსალოდნელი იყოს ჯერ კიდევ“,-განაცხადა ტიკარაძემ.

კითხვაზე, თუ რამდენად არის შესაძლებელი 24 დეკემბრიდან კვლავ ძალაში დარჩეს კორონავირუსისი პანდემიის გამო, ქვეყანაში დაწესებული შეზღუდვები, ეკატერინე ტიკარაძე აცხადებს რომ გადაწყვეტილებების მიღება სპონტანურად არ ხდება, მას მსჯელობა და ეპიდსიტაუციის გაანალიზება სჭირდება.

„ჩვენ ვმსჯელობთ, ამას რიცხვები გვიჩვენებენ. ჩვენ გადაწყვეტილებებს სპონტანურად არ ვიღებთ, დინამიკას ვაკვირდებით, თუ როგორია ინფექციის მატება, ასევე ლეტალობის შემთხვევები, მნიშვნელოვანია გავითვალისწინოთ კლინიკების გადატვირთულობა, რომ მათაც მიეცეთ საშუალება ყველა პაციენტს შესაბამისად მისცენ ხარისხიანი მომსახურება, ამ ყველაფრის ჯამურად გაანალიზებისას მივიღებთ ერთობლივ გადაწვეტილებას“ - განაცხადა ტიკარაძემ.