ბათუმში დღეს კიდევ ერთი მედიკოსი, ტრავმატოლოგი შოთა ბერიძე გარდაიცვალა.

ბათუმის რესპუკბლიკური სააავადმყოს ექიმის, გია კიკაბიძის თქმით, ფილტვის 45%-იანი დაზიანება და ორმხრივი პნევმონია ჰქონდა. გარდაცვლილი კლინიკაში 6 დეკემბერს მოათავსეს, იგი მანამდე კოვიდსასტუმროში მკურნალობდა.

"ბათუმის რესპუბლიკური საავადმყოფოს გუნდს, კიდევ ერთი შესანიშნავი ადამიანი დააკლდა, იგი თავისი შინაგანი კულტურითა და პატიოსნებით გამოირჩეოდა. ავადმყოფებზე შეყვარებული ექიმი, რომელსაც პაციენტი გაჭირვების ჟამს არასდროს მიუტოვებია, სამწუხაროდ, 63 წლის ასაკში გარდაიცვალა. რამდენიმე დღის წინ, კორონავირუსი დაუდგინდა და 4 დღის განმავლობაში კოვიდსასტუმროში იმყოფებოდა, 6 დეკემბერს ჩვენს კლინიკაში მოათავსეს. მას კომპიუტერული ტომოგრაფია ჩაუტარდა და ფილტვის 45 პროცენტიანი დაზიანება და ორმხრივი პნევმონია აღენიშნებოდა. ფილტვების შეშუპების გამო, გუშინ მართვით სუნთქვაზე გადავიყვანეთ, ჩატარებული ღონისძიებების მიუხედავად მისი გადარჩენა ვერ მოხერხდა. ქრონიკული თანმხლები დაავადებები ჰქონდა. იგი ექიმი -ტრავმატოლოგის პოზიციაზე მუშაობდა. 2011 წლიდან რესპუბლიკურ საავადმყოფოში, ხოლო მანამდე ქალაქის პირველ საავადმყოფოში მუშაობდა",- განაცხადა გია კიკაბიძემ.

აქვე გეტყვით, რომ აჭარაში საერთო ჯამში, სამედიცინო სფეროს 8 წარმომადგენელი კორონავირუსით გარდაიცვალა.