რუსთავის გზატკეცილზე პოლიციამ ავტომობილიდან 4 კილოგრამი ნარკოტიკი ამოიღო

კრიმინალი - 10:17, 05 Nov, 2020

2133

გარდაბანი-რუსთავის დამაკავშირებელ საავტომობილო გზაზე პოლიციამ მოძრავი ავტომობილი გააჩერა და ჩხრეკისას მასში 4 კილოგრამი ნარკოტიკული საშუალება იპოვნა. ფაქტზე დაკავებულია 33 წლის პირი. შინაგან საქმეთა სამინისტრო მომხდარზე ოფიციალურ განცხადებას ავრცელებს:

"შინაგან საქმეთა სამინისტროს ქვემო ქართლის პოლიციის დეპარტამენტის თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1987 წელს დაბადებული ნ.კ. განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ბრალდებით დააკავეს.
დანაშაული 8-დან 20 წლამდე ან უვადო თავისუფლების აღკვეთას ითვალისწინებს.
სამართალდამცველებმა ბრალდებული გარდაბანი-რუსთავის დამაკავშირებელ საავტომობილო გზაზე, ავტომობილით გადაადგილებისას შეაჩერეს. პოლიციამ, ნ.კ.-ის ხელბარგის ჩხრეკის შედეგად, ნივთმტკიცების სახით ამოიღო 4 შეკვრად დაფასოებული, 4 კილოგრამამდე ნარკოტიკული საშუალება, რომელიც 1 კილოგრამამდე „ჰეროინს“ შეიცავს.
განსაკუთრებით დიდი ოდენობით ნარკოტიკული საშუალების უკანონო შეძენა- შენახვის ფაქტზე გამოძიება საქართველოს სისხლის სამართლის კოდექსის 260-ე მუხლის მე-6 ნაწილით მიმდინარეობს" - ნათქვამია განცხადებაში.