საქართველოს ეროვნული ბანკის ინფორმაციით, ლარის ოფიციალური გაცვლითი კურსი დოლართან მიმართებაში უკანსაკნელი დღეების განმავლობაში კიდევ 10 პუნქტით დაეცა და 1.6878 ნიშნულს მიაღწია.

ეს კი ბოლო ორწელიწად-ნახევრში ყველაზე დაბალი მაჩვენებელია.

აღსანიშნავია, რომ ეროვნული ვალუტის კურსმა 1.68 ნიშნულს 2011 წლის ივლისის შემდეგ პირველად ოთხი დღის წინ ”გადააბიჯა” და ყოველდღე, სულ მცირე, 10 პუნქტით ეცემა. 

ლარმა შეუმჩნევლად გაუფასურება ნოემბრის დასაწყისში დაიწყო. 7 ნოემბერს მისმა ღირებულებამ ორწლიანი რეკორდი მოხსნა და 1.6792 ნიშნულს მიაღწია, თუმცა, მედიაში დაწყებული ფართო განხილვების შემდეგ კვლავ გამყარდა. ექსპერტთა ნაწილი მიიჩნევდა, რომ ლარის გაუფასურება ბიუჯეტის ”გადასარჩენად” ხორციელდება, მეორე ნაწილის აზრით, ძველ ხელისუფლებას კურსი ხელოვნურად ეჭირა, დღეს კი ეროვნული ვალუტა ამ კონტროლისგან თავისუფალია.