29 ნოემბერს მსოფლიოში ქალთა უფლებების დამცველთა საერთაშორისო დღე აღინიშნება. სწორედ, ამ დღესთან დაკავშირებით „ქალთა ფონდი საქართველოში“ აწესებს „კატო მიქელაძის სახელობის პრემიას“ ქალთა უფლებების დამცველებისათვის.

აღნიშნული პრემია, ყოველწლიურად, 29 ნოემბერს გადაეცემა ქალთა უფლებების დამცველ ერთ-ერთ აქტივისტს საქართველოში, რომელიც გამოვლინდება ქალთა ფონდის დირექტორთა და მრჩეველთა საბჭოს წევრების ხმათა უმრავლესობით. კატო მიქელაძე მეოცე საუკუნის დასაწყისში მოღვაწე ქართველი ფემინისტი, აქტივისტი და პუბლიცისტი იყო, ქართული სუფრაჟიზმის ფუძემდებელი და თავდადებული მებრძოლი ქალთა ემანსიპაციის მისაღწევად.

პროექტის მიზანია, ხაზი გაესვას იმ მემკვიდრეობას, რომელიც ქართველ ფემინისტ ქალებს და უფლებედამცველებს გააჩნიათ. ასევე, ეს არის მცდელობა არ მიეცნენ დავიწყებას ის ქალები, რომლებმაც უდიდესი წვლილი შეიტანეს საქართველოში ქალთა უფლებების მოსაპოვებლად.

კატო მიქელაძის პრემიის გამარჯვებულის დაჯილდოვების ცერემონია გაიმართება კაფე „ფრონტლაინში“(მის: თაყაიშვილის ქ. 3), სადაც ფილოსოფოსი, ქალთა უფლებების აქტიური დამცველი ლელა გაფრინდაშვილი ისაუბრებს კატო მიქელაძის როლზე ქალთა უფლებების დაცვის საკითხში. ასევე, საუბარი იქნება პრემიაზე ნომინირებული აქტივისტების წვლილსა და დამსახურებაზე ქალთა უფლებებისთვის ბრძოლაში.

ღონისძიება ტარდება გენდერული ძალადობის წინააღმდეგ ბრძოლის 16 დღიანი კამპანიის ფარგლებში.