„ერთი ადამიანია შიგნით, ახალგაზრდა ბიჭი, ნიღბის გარეშე... რამდენადაც მახსოვს, ცეცხლსასროლი იარაღი ჰქონდა, რამოდენიმეჯერ გაისროლა... მე აპარატთან ვიდექი, კლიენტს ვემსახურებოდი, ასე გვითხრა, დაწექით ყველანი, ძარცვა არისო. სხვა არაფერი მახსოვს, ისიც არ ვიცი, გარეთ როგორ აღმოვჩნდი, კლიენტს რომ ვემსახურებოდი, ალბათ მან გამომიყვანა, მერე შიგნით რა მოხდა, თანხა მოითხოვა თუ არა - დეტალები არ ვიცი. თანამშრომლებთან ერთად, მომხმარებლებიც არიან შიგნით. ტელეფონი იქ დამრჩა, ვერც ვუკავშირდები შიგნით ვინმეს, ნომრები ზეპირად არ მახსოვს...“ - განაცხადა „საქართველოს ბანკის“ თანამშრომელმა, რომელიც ცოტა ხნის წინ გამოვიდა შენობიდან, სადაც შეიარაღებულ პირს მძევლები ჰყავს აყვანილი.