განახლებულია 07:00

საქართველო–სომხეთის საზღვართან კრიმინალური გარჩევის დროს ორი ადამიანი მოკლეს. სარწმუნო წყაროს ცნობით, ერთერთი მოკლული მერაბ კალანდაძეა, რომელიც, წინასწარი ინფორმაციით, ორ პირს საქართველოდან სომხეთში აცილებდა.

ჩვენს ხელთ არსებული ექსკლუზიური ინფორმაციით, კრიმინალთა სხვა ჯგუფმა, რომლებსაც პირადი ანგარიშსწორების მოტივი ამოძრავებდათ, მერაბ კალანდაძესა და მასთან ერთად მყოფ ორ პირს ცეცხლი გაუხსნა.

წყარო არ გამორიცხავს, რომ სროლა ორმხრივი იყო, თუმცა, ადასტურებს, რომ სროლის შედგად მერაბ კალანდაძე და ერთი პირი დაიღუპნენ, კალანდაძის თანმხლები მაკაცი კი, სავარაუდოდ, დაჭრილია.

მერაბ კალანდაძე თხევადი აირის ბიზნესით იყო დაკავებული. იყო „ავტოგაზის“ მეწილე, წარსულში ნასამართლევია: 2009 წელს კუდ–ის თანამშრომლებმა დიდი რაოდენობით ქრთამის აღებისთვის დააკავეს. 

მაშინ კალანდაძე საქართველოს ეკონომიური განვითარების სამინისტროს ზედამხედველობის სახელმწიფო ინსპექციის, ბუნებრივი თხევადი გაზისა და მაგისტრალური გაზსადენების სისტემების ზედამხედველობის სამმართველოში მუშაობდა. 

წინასწარი ინფორმაციით, მერაბ კალანდაძე კრიმინალური სამყაროს ე.წ. ავტორიტეტებთან დაახლოებული პირი იყო.

ინფორმაციის გადამოწმება შსს–სთან, ჯერჯერობით, ვერ მოხერხდა. დამატებით დეტალებს და, სავარაუდოდ, შსს–ს პრესსამსახურის კომენტარს „ნიუპოსტი“, მისი არსებობის შემთხვევაში, მოგაწვდით.