გორში მომხდარი უბედური შემთხვევა თუ ჯგუფური ძალადობა ჯარისკაცზე? - თავდაცვის სამინისტრო სპეციალურ განცხადებას ავრცელებს

შემთხვევა - 17:06, 06 Oct, 2020

1383

საქართველოს თავდაცვის სამინისტრო გორში ჯარისკაცის მძიმედ დაშავების ფაქტს ეხმაურება და სპეციალურ განცხადებას ავრცელებს, რომელსაც ნიუპოსტი უცვლელად გთავაზობთ:
"გვსურს, გამოვეხმაუროთ მედიასაშუალებებში გავრცელებულ ინფორმაციას საქართველოს თავდაცვის ძალების სამხედრო მოსამსახურის დაშავების შესახებ. პირველი ქვეითი ბრიგადის ერთ-ერთმა სამხედრო მოსამსახურემ, დასვენების დღეებში დათხოვნაში მყოფმა, არასამსახურეობრივ პირობებში მიიღო გარკვეული დაზიანებები, რის შედეგადაც ის მოხვდა საავადმყოფოში. თავად დაშავებული სამხედრო მოსამსახურის განმარტებით, ის იმყოფებოდა მეგობრის წვეულებაზე, საიდანაც სახლში ნასვამ მდგომარეობაში ბრუნდებოდა. სახლისკენ მიმავალ გზაზე სამხედრო მოსამსახურე ჩავარდა მდინარის პირას წყლის არხში და შედეგად მიიღო დაზიანება, რის შემდეგაც თავად დაურეკა 112-ს. თავდაპირველად ის გორის სამხედრო ჰოსპიტალში გადაიყვანეს, ხოლო მოგვიანებით, შესაბამისი პროფილის სამედიცინო დაწესებულებაში. დაშავებული სამხედროს მდგომარეობა ამ დროისთვის სტაბილურია. მან უკვე მისცა ჩვენება სამართალდამცავებს. მომხდარ ინციდენტთან დაკავშირებით მიმდინარეობს გამოძიება" - ნათქვამია განცხადებაში.

შეგახსენებთ, რომ 40 წლის სამხედრო მოსამსახურე ზვიად ჯანიაშვილი პოლიციამ წმინდაწყლის დასახლებაში მძიმე მდგომარეობაში სხეულის სხვადასხვა დაზიანებებით იპოვნა. მას გადაუდებელი ოპერაცია ჩაუტარდა და ახლა რეანიმაციულ განყოფილებაშია მოთავსებული. მომხდარის გარშემო ორი ვერსია არსებობს - ერთ-ერთის მიხედვით მას სხვა ჯარისკაცები გაუსწორდნენ ფიზიკურად, მეორე ვერსიით კი თავად გადავარდა ხიდიდან და მძიმედ დაშავდა.