ჯგუფური ყაჩაღობა თბილისში-"ტაქსის მძღოლს თავს დაესხნენ, ბლაგვი საგანი ჩაარტყეს, შებოჭეს და ბასრი საგნის მუქარით ნივთები გასტაცეს"

სამართალი - 12:02, 02 Oct, 2020

1253

ჯფუფური ყაჩაღობა თბილისში, ასათიანის ქუჩისა და ვაჟა ფშაველას გამზირის კვეთაზე ტაქსის მძღოლსთავს დაესხნენ. მას თავში ბლაგვი საგანი ჩაარტყეს, შებოჭეს და ბასრი საგნის მუქარით კუთვნილი ნივთები გასტაცეს.

პოლიციამ დამნაშავეები ცხელ კვალზე წარსულში ნასამართლევი ორი პირი - 1968 წელს დაბადებული რ.კ. და 1970 წელს დაბადებული დ.მ. დააკავა.

"გამოძიებით დადგინდა, რომ ნასვამ მდგომარეობაში მყოფი ბრალდებულები თბილისში, ასათიანის ქუჩისა და ვაჟა-ფშაველას გამზირის კვეთაზე ტაქსიში ჩასხდნენ. ერთ-ერთმა ბრალდებულმა აღნიშნული ტაქსის მძღოლს - 1972 წელს დაბადებულ ა.ზ.-ს თავში ბლაგვი საგანი ჩაარტყა, ხოლო მეორემ შებოჭა, რის შემდეგაც თავდამსხმელებმა ბასრი საგნის მუქარით მას კუთვნილი ნივთები გასტაცეს."-აცხადებს შსს.

სამართალდამცველებმა მართლსაწინააღმდეგოდ დაუფლებული ნივთები - ნივთმტკიცების სახით ამოიღეს.

ჯგუფურად ჩადენილ ყაჩაღობის ფაქტზე გამოძიება საქართველოს სისხლის სამართლის კოდექსის 179-ე მუხლის მე-2 ნაწილის “ბ” და ”გ” ქვეპუნქტებით მიმდინარეობს.

დანაშული 6-დან 9 წლამდე ვადით თავისუფლების აღკვეთას ითვალისწინებს.