"სიცოცხლის მოსპობით დაემუქრა...“- სამცხე-ჯავახეთში დააკავეს კაცი, რომელიც ცოლზე და მოხუც მშობლებზე სისტემატიურად ძალადობდა

სამართალი - 10:40, 09 Sep, 2020

1110

სამცხე-ჯავახეთში ოჯახის წევრების მიმართ ძალადობის ბრალდებით პოლიციამ 1975 წელს დაბადებული მამაკაცი დააკავა.

როგორც „ნიუპოსტს“ შინაგან საქმეთა სამინისტროდან აცნობეს, დაკავებული ბოლო სამი თვის განმავლობაში მეუღლეზე მამასა და დედაზე სისტემატიურად ძალადობდა.

„შინაგან საქმეთა სამინისტროს სამცხე-ჯავახეთის პოლიციის დეპარტამენტის ნინოწმინდის რაიონული სამმართველოს თანამშრომლებმა, ჩატარებული ოპერატიულ-საგამოძიებო მოქმედებების შედეგად დაადგინეს,რომ ბრალდებული ბოლო სამი თვის განმავლობაში სისტემატურად ძალადობდა მეუღლის - 1975 წელს დაბადებული ა.ი.-ის, მამის - 1948 წელს დაბადებული შ.ი.-ისა და დედის - 1950 წელს დაბადებული ნ.ი.-ის მიმართ. ერთ-ერთი ურთიერთშელაპარაკების დროს, ა.ი. ოჯახის წევრებს სიცოცხლის მოსპობით დაემუქრა და საცხოვრებელ სახლში არსებული ავეჯი დააზიანა.

გამოძიება ოჯახში ორი ან მეტი პირის მიმართ ჩადენილ ძალადობისა და მუქარის ფაქტებზე, საქართველოს სსკ-ის 126-ე პრიმა მუხლის მე-2 ნაწილის "გ" ქვეპუნქტით და 11 პრიმა 151-ე მუხლის მე-2 ნაწილის "დ" ქვეპუნქტით მიმდინარეობს.დანაშაული 3 წლამდე ვადით თავისუფლების აღკვეთას ითვალისწინებს“- ნათქვამია შინაგან საქმეთა სამინისტროს განცხადებაში.