26 ნოემბრიდან 5 დეკემბრამდე თბილისში მოყვარულ სტუდენტურ თეატრთა ფესტივალი ,,ნიღაბი” ჩატარდება. „მოყვარულ სტუდენტურ თეატრთა ასოციაცია” დაარსდა 2012 წელს. პირველად საქართველოში, ასოციაციამ დააფუძნა მოყვარულ სტუდენტურ თეატრთა ფესტივალი ,,ნიღაბი”.

“ნიღაბი” არის ყოველწლიური ფესტივალი, სადაც სხვადასხვა უნივერსიტეტების თეატრალური დასები წარადგენენ მათ მიერ დადგმულ სპექტაკლებს. ფესტივალის მთავარი მიზანია უნივერსიტეტების სტუდენტებს შორის კომუნიკაცია, გამოცდილების გაზიარება და მომავალში პროფესიული და შემოქმედებითი ურთიერთობების ჩამოყალიბება, შემეცნებითი თვალსაწიერის გაფართოება, ხელოვნების პროპაგანდა და სტუდენტური ცხოვრების გამრავალფეროვნება.

პირველი ფესტივალი წარმატებით ჩატარდა 2012 წლის 10-17 დეკემბერს. მიმდინარე წელს დაგეგმილია რიგით მეორე ფესტივალის - “ნიღაბი 2013” ჩატარება. ფესტივალის გენერალური სპონსორია - ქალაქ თბილისის მერია. ფესტივალში წელს მონაწილეობენ სტუდენტური დასები საქარტველოდან, აზერბაიჯანიდან და თურქეთიდან. ფესტივალის მხარდამჭერები არიან – თბილისის სახელმწიფო სამედიცინო უნივერსიტეტი, „თი ბი სი ბანკი“, სასტუმრო „ლოპოტა“, რადიო „აფხაზეთის ხმა“ და რადიო „დარდიმანდი“. ფესტივალი თბილისის სახელმწიფო სამედიცინო უნივერსიტეტის III კორპუსის თეატრალურ დარბაზში ჩატარდება, მისამართი: ქ.თბილისი, ვაჟა-ფშაველას 29. ფესტივალის დახურვა და დაჯილდოების ცერემონიალი ჩატარდება “თიბისი” გალერეაში.