ბათუმში, მარუხის ქუჩაზე ახალი სამსართულიანი კორპუსი პირდაპირ ტროტუარზეა აშენებული. ფოტოზე, რომელიც აჭარის საზოგადოებრივი მაუწყებლის ჟურნალისტმა გადაიღო ჩანს, რომ საავტომობილო გზაზე არის მონიშვნებიც. ქუჩის ნაწილი კი სახლს აქვს დაკავებული. აღნიშნულ მონაკვეთში გზა ვიწროვდება.

სამსართულიანი სახლი ახალაშენებულია. გვერდით დგას სხვა კერძო სახლები.

ქუჩის მეორე მხრიდან გადაღებულ ფოტოში კი კორპუსი ძველ სახლების გასწვრივაა აშენებული.

აჭარის საზოგადოებრივი მაუწყებელი ბათუმის მერიას დაუკავშირდა, უწყებაში წერილობითი განცხადება გაავრცელეს, სადაც აღნიშნულია, რომ ე.წ. ჭაობის დასახლებაში სახლი უნებართვოდაა აშენებული.

''მარუხის ქუჩაზე გამოვლენილ უნებართვო მშენებლობასთან დაკავშირებით ბათუმის მუნიციპალური ინსპექციის მიერ ადმინისტრაციული წარმოება დაიწყო, რაც ჯარიმასა და შენობა-ნაგებობის დემონტაჟს ითვალისწინებს.

2019 წელს აღნიშნული მიწის ნაკვეთის მესაკუთრემ, მშენებლობის ნებართვის მიღების მიზნით, ბათუმის მერიის არქიტექტურისა და ურბანული განვითარების სამსახურს მიმართა. განმცხადებელს უარი ეთქვა სივრცით-მოცულობითი თვალსაზრისიდან გამომდინარე, ვინაიდან სამშენებლო ტერიტორია მოიცავდა საავტომობილო გზის ნაწილსაც. აღნიშნულ მონაკვეთში კი, მშენებლობის წარმოება ჩაითვალა მიუღებლად.

დისციპლინური წარმოება დაიწყო მუნიპალიტეტის იმ თანამშრომლებთან მიმართებაში, რომელთაც, თავიანთი კომპეტენციის ფარგლებში, უშუალოდ ევალებოდათ ფაქტზე რეაგირება'' - აღნიშნულია მერიის მიერ გავრცელებულ ინფორმაციაში.

წყარო: აჭარის ტელევიზია