გაურკვეველ ვითარებაში გარდაცვლილი პროგრამისტის, თამარ ბაჩალიაშვილის ოჯახის ადვოკატი, მიხეილ რამიშვილი ამბობს, რომ საქმეში არსებულ დრონით გადაღებულ ვიდეომასალაში არ ჩანს ის ადგილი, სადაც თამარ ბაჩალიაშვილის ავტომობილი იპოვეს.

მისი თქმით, “გამოძიება ვერ მიმდინარეობს იმ სცენარით, რა სცენარიც ჰქონდათ დადგმული”.

“ბევრი ვერსია არსებობდა,თითქოს თამარს შეიძლებოდა ნარკოტიკებთან ჰქონოდა შემხებლობა, პორნოგრაფიასთანაც ჰქონია შემხებლობა. ეს იყო დადგმული, კარგად ორგანიზებული და ყველაფერი გათვლილი იყო თავიდანვე, მაგრამ ვერ მიმდინარეობს იმ სცენარით, რა სცენარსაც ჰქონდა ადგილი”, - განაცხადა რამიშვილმა.

რაც შეეხება ჩანაწერებს, ადვოკატი ამბობს, რომ ჩანაწერები არის გაკეთებული 19 ივლისიდან 21 ივლისამდე.

"სულ არის გაკეთებული 9 ჩანაწერი. გადაღებულია 62 სურათი. ყველაზე დიდი მასალა არის 21 წუთიანი. შემთხვევის ადგილას მიახლოებითაც კი არ არის ტერიტორია დაფიქსირებული. გაურკვეველი ტერიტორიებია დაფიქსირებული, გაურკვეველი ტყე, რკინიგზის ტერიტორია. არ ვიცი, სად ახორციელებდა თეთრიწყაროს პოლიცია დრონის გადაღებებს და სად ახორციელებდნენ სამძებრო სამუშაოებს, ჩემთვის გაუგებარია. თეთრიწყაროს რაიონის პოლიცია არანაირ სამძებრო სამუშაოებს არ ახორციელებდა. ალბათ, რამდენიმე კილომეტრის იქით ეძებდნენ, რაღაც სოფლები არის დათვალიერებული. არაფრის მომცემი კადრები არ არის. სპეციალურად არ ჩატარდა სამძებრო სამუშაოები იმ მიმართულებით, სადაც ბოლო ინფორმაციით გაიარა თამარის ავტომობილმა.

მივყვებით ახლა საგამოძიებო მოქმედებების მიმდინარეობას, ჩვენებების გაცნობას და ველოდები სატელიტიდან სურათებს 18-22 ივლისამდე შემთხვევის ადგილზე გადაცემული კოორდინატებით, რომ ერთხელ და სამუდამოდ დადასტურდეს, იდგა თუ არა იქ თამარის ავტომობილი”, - განაცხადა რამიშვილმა.