ადვოკატებმა გიორგი რურუას განაჩენი გასააჩივრეს

სამართალი - 20:06, 28 Aug, 2020

1664

გავასაჩივრეთ ვალერიან ბუგიანიშვილის პოლიტიკური განაჩენი - "მთავარი არხის" ერთ-ერთი მეწილის, ცეცხლსასროლი იარაღის უკანონო შეძენა-შენახვა-ტარების საქმეზე მსჯავრდებულ გიორგი რურუას ადვოკატმა, დიმიტრი საძაგლიშვილმა განცხადა.
ადვოკატები აცხადებენ, რომ მოსამართლის გადაწყვეტილება დაუსაბუთებელია.

„გავასაჩივრეთ ვალერიან ბუგიანიშვილის პოლიტიკური განაჩენი. ეს იყო დაუსაბუთებელი და შეიძლება ითქვას, სასაცილო განაჩენი, რადგან მოსამართლემ დაამახინჯა მოწმეების ჩვენებები, კერძოდ, დაცვის მხარის მოწმეებს ისეთი რამ დააბრალა, რაც მათ არ უთქვამთ. მეორე მხრივ, მოსამართლემ პოლიციელებთან დაკავშირებით თვალი დახუჭა და საერთოდ არ შეაფასა მათი ჩვენებების ის ნაწილი, სადაც დადასტურდა, რომ ისინი იტყუებოდნენ ან ურთიერთსაწინააღმდეგო ჩვენებებს იძლეოდნენ. ასევე, საერთოდ არც კი იმსჯელა იმ მოწმეთა ჩვენებებზე, რაც ამ შემთხვევაში ყველაზე მნიშვნელოვანი და გამამართლებელი მტკიცებულება იყო.

მოსამართლე არ შეეხო დაქტილოსკოპიური ექსპერტიზის დასკვნას, რომლის თანახმად, რურუასთვის ჩადებულ ცეცხლსასროლ იარაღზე არ აღმოჩნდა თავად გიორგი რურუას თითის ანაბეჭდები და შესაბამისად, ეს დასკვნა ცალსახად ადასტურებდა მის უდანაშაულობას. პრინციპში, ჩვენთვის ლოგიკური და მოსალოდნელი იყო, ამ შინაარსის განაჩენის გამოტანა, რადგან ბუგიანიშვილი ამ გადაწყვეტილებას არა საქმეში არსებული მტკიცებულებების საფუძველზე, არამედ დაკვეთით იღებდა“, – განაცხადა დიმიტრი საძაგლიშვილმა.

ცნობისთვის, თბილისის საქალაქო სასამართლომ გიორგი რურუა ცეცხლსასროლი იარაღის უკანონო შეძენა-შენახვა-ტარებასა და სასამართლო გადაწყვეტილების შეუსრულებლობაში დამნაშავედ სცნო და ოთხი წლით თავისუფლების აღკვეთა მიუსაჯა.