"იქნებ დროულად სიკვდილი სჯობდეს" – გელა ჩარკვიანის ემოციური პოსტი შატილის ტრაგედიაზე

სოც.მედია - 16:10, 24 Aug, 2020

4679

მწერალი და დიპლომატი გელა ჩარკვიანი დუშეთში მომხდარ ტრაგედიას ემოციური პოსტით ეხმაურება:

"თითქოს პირიქით უნდა იყოს, თუმცა სინამდვილეში, ასაკის მატებასთან ერთად, სულ უფრო მგრძნობიარე და სენტიმენტალური ხდები. ალბათობათა მზაკვრობით დაშინებული, მარად ცუდი ამბის გაგონებას ელი. იქნებ დროულად სიკვდილი სჯობდეს. სიცოცხლე მყიფეა და, თუ დიდხანს ცხოვრობ, ბევრი უბედურება შეიძლება ნახო. მახსოვს, როგორ განიცდიდა უკვე ღრმად მოხუცებული მამაჩემი ჩემს ყოველ მოგზაურობას საზღვარგარეთ შევარდნაძესთან ერთად. წინათ ასე არ ვიყავიო, მეუბნებოდა. ტრაგიკულად დასრულებული ავტოავარიის ან ავიაკატასტროფის ყოველი შემთხვევა რამდენიმე დღით მოსვენებას მიკარგავს. მტანჯავს ყოველი ცნობა ადამიანის, განსაკუთრებით ახალგაზრდის და, კიდევ უფრო, ბავშვის სიკვდილის შესახებ, მსოფლიოს რომელ კუთხეშიც არ უნდა ხდებოდეს ეს. რაღა ის? რაღა იმ დროს? რაღა იმ ადგილას? ახალი ამბების საიტებზე თვალს გადავავლებ ინფორმაციებს და თუ რაიმე „საეჭვოს“ შევნიშნავ, გამოვტოვებ, არ წავიკითხავ. არ მინდა კიდევ ერთხელ დავრწმუნდე ადამიანის სიცოცხლის სრულ დაუცველობაში. ვინ გვამასხარავებს ასე დაუნდობლად?!", – წერს ჩარკვიანი.
შეგახსენებთ, რომ გუშინ დატრიალებული ტრაგედიის შედეგად 17 ადამიანი გარდაიცვალა, სამი კი მძიმედ დაშავდა. შატილიდან თბილისისკენ მიმავალი მიკროავტობუსი 80 მეტრის სიმაღლიდან, ხევში გადაიჩეხა.