შინაგან საქმეთა სამინისტროს ცნობით, პოლიციამ 4 ივნისს ბოლნისში მომხდარი განზრახ მკვლელობის საქმეზე ბრალდებული პირი დააკავა.

უწყების ცნობით, მკვლელობა წარსულში არსებული დაპირისპირების გამო მოხდა. დაკავებულმა თავისი ნაცნობი ცეცხლსასროლი იარაღით სასიკვდილოდ დაჭრა და შემთხვევის ადგილიდან მიიმალა.

"გამოძიებით დადგინდა, რომ ბრალდებულმა მიმდინარე წლის 4 ივნისს, ბოლნისის მუნიციპალიტეტის სოფელ ქვემო ბოლნისის ტერიტორიაზე, წარსულში არსებული დაპირისპირების გამო, ნაცნობი - 1988 წელს დაბადებული ი.ზ. ცეცხლსასროლი იარაღიდან გასროლით სასიკვდილოდ დაჭრა და შემთხვევის ადგილიდან მიიმალა.

სამართალდამცველებმა ბრალდებული ბოლნისის მუნიციპალიტეტში, მოსამართლის განჩინების საფუძველზე დააკავეს. პოლიციამ, ბრალდებულის პირადი ჩხრეკის შედეგად, ცეცხლსასროლი პისტოლეტი და 6 საბრძოლო ვაზნა ამოიღო.

განზრახ მკვლელობის ფაქტზე, გამოძიება საქართველოს სისხლის სამართლის კოდექსის 108-ე მუხლით მიმდინარეობს," -ნათქვამია განცხადებაში.