FBI-ს ჩართვა კონსულტაციების დონეზე ნამდვილად არ მაწყობს - თამარ ბაჩალიაშვილის ოჯახი შსს-ში მივიდა

სამართალი - 11:58, 05 Aug, 2020

1092

ახალგაზრდა პროგრამისტის ოჯახი შსს-ში მივიდა - თამარ ბაჩალიაშვილის დედამ, თეონა თამაზაშვილმა შინაგან საქმეთა სამინისტროსთან კომენტარი გააკეთა და აღნიშნა, რომ

საქმეში FBI-ს ჩართვა კონსულტაციების დონეზე მათ არ აწყობთ.

შეხვედრის წინ თეონა თამაზაშვილმა თქვა, რომ თამარ ბაჩალიაშვილის საქმის გამოძიება ფედერალურმა ბიურომ მისი დაკარგვის დღიდან უნდა დაიწყოს.

„ჩემი კითხვები იმაზე იქნება დამოკიდებული, რამდენად ჩართავდნენ FBI-ს საქმეში და ამის გამო მოვედი. გააჩნია, FBI-ს რა დონეზე ჩართავენ იმიტომ, რომ კონსულტაციების დონეზე მათი ჩართვა ნამდვილად არ მაწყობს. დაწყებული დაკარგვის დღიდან, დამთავრებული დღემდე FBI უნდა იყოს ჩართული.

ყველაფერი უნდა გამოიძიოს ფედერალურმა ბიურომ - რატომ დაიკარგა თამარი, რატომ ვერ მოძებნეს 5 დღის მანძილზე, რატომ გასუფთავდა კომპიუტერი და ანალოგიურად, მანქანაც როცა გაიხსნება, შემდეგ გავიგებთ. ველოდებით ფედერალური ბიუროს ჩამოსვლას და ისე გაიხსნება.

მაღალჩინოსნებთან არის დაკავშირებული, რადგან ამდენი ხარვეზია გამოძიებაში. არც ერთ კითხვაზე ჯერ პასუხი არ გაუციათ. ვნახოთ, რამდენ კითხვაზე გამცემენ პასუხს.

პირველი მოთხოვნა იქნება, დრონის კადრები მანახონ“, - განაცხადა თეონა თამაზაშვილმა.