დაპირისპირება ხულოს საკრებულოში - ანზორ ბოლქვაძემ და საკრებულოს თავმჯდომარის მოადგილე ერთმანეთს ფიზიკურად გაუსწორდნენ

შემთხვევა - 10:53, 31 Jul, 2020

1566

ხულოს საკრებულოს შენობაში "ქართული ოცნების" მიერ ხულოს, ქედის, შუახევისა და ხელვაჩაურის მაჟორიტარი დეპუტატობის კანდიდატად დასახელებული ანზორ ბოლქვაძე და საკრებულოს თავმჯდომარის მოადგილე თამაზ აბაშიძე ერთმანეთს ფიზიკურად გაუსწორდნენ.

დაპირისპირება ხულოს მერის კაბინეტში მოხდა. ჩხუბი კი, მოახლოებულ არჩევნებში მაჟორიტარობის კანდიდატად ანზორ ბოლქვაძის დასახელებას მოჰყვა.

როგორც ხულოს მუნიციპალიტეტის საკრებულოს ფრაქცია "ერთიანი ნაციონალური მოძრაობის" თავმჯდომარე ირაკლი ჯორბენაძე აცხადებს აბაშიძესა და ბოლქვაძეს შორის დაპირისპირება, გუშინ, ალპური ბოტანიკური ბაღის გახსნაზე დაიწყო.

ოპოზიციის ინფორმაციით, თამაზ აბაშიძე მძიმედაა ნაცემი, ჭრილობები თავის არეში აქვს მიყენებული და ამ დროისთვის საავადმყოფოში იმყოფება.

ანზორ ბოლქვაძე კი საცხოვრებელ სახლშია.

შეგახსენებთ, რომ ანზორ ბოლქვაძე "ქართულმა ოცნებამ" ხულოს, ქედის, შუახევისა და ხელვაჩაურის მაჟორიტარი დეპუტატობის კანდიდატად წარადგინა.

ანზორ ბოლქვაძე პარლამენტში 2008 წელს "ნაციონალური მოძრაობის" კვოტით, მაჟორიტარული წესით მოხვდა. 2012 წელს კი ის "ოცნების" რიგებს შეუერთდა. 2016 წელს ხულოს, შუახევისა და ქედის საარჩევნო ოლქები ისევ "ოცნების" სახელით მოიგო და 2020 წლის არჩევნებში მოსაგებადაც "ოცნების" სახელით იბრძვის.