მამის დაზარალებულის უფლებამონაცვლედ ცნობა და კვალიფიკაციის შეცვლა - გარდაცვლილი თამარ ბაჩალიაშვილის ოჯახის ადვოკატის მოთხოვნა

სამართალი - 10:46, 24 Jul, 2020

1447

გარდაცვლილი თამარ ბაჩალიაშვილის ოჯახის ადვოკატი მიხეილ რამიშვილი ამბობს, რომ მისთვის საქმის მასალები არ გადაუციათ, რადგან დაზარალებულის უფლებამონაცვლედ ჯერ არავინ არის ცნობილი.

ადვოკატი თვლის, რომ საქმის კვალიფიკაციის შეცვლა უნდა მოხდეს, რადგან რამიშვილისთვის გაუგებარია, რატომ მიდის გამოძიება თავისუფლების უკანონო აღკვეთის მუხლით, როდესაც 23 წლის გოგონა გარდაცვლილია.

„მამამისი უნდა იყოს დაზარალებულის უფლებამონაცვლედ ცნობილი. საქმე ჯერ ისევ 143-ე მუხლით არის აღძრული, რაც ძალიან გასაკვირია. სასწრაფოდ მოვითხოვე, რომ უფლებამონაცვლედ ცნობილი იყოს მამამისი. მოვითხოვე ხვალვე გამაცნონ ყველა ის მასალა, რაც საქმეშია. სხვადასხვა მასალას ელოდებიან სხვადასხვა მხარეებიდან, დაკითხვები მიმდინარეობს და დაუყოვნებლივ მოვითხოვე, რომ ხვალ მოხდეს მამამისის დაზარალებულის უფლებამონაცვლედ ცნობა, კვალიფიკაციის შეცვლა და ხვალვე მოხდეს საქმის მასალის გაცნობა",-განაცხადა ადვოკატმა.

ცნობისთვის, 23 წლის თამარ ბაჩალიაშვილი რამდენიმე დღის განმავლობაში გაუჩინარებული იყო. ის 22 ივლისს, თეთრიწყაროს მუნიციპალიტეტში, ტყესთან, საკუთარ ავტომობილში გარდაცვლილი იპოვეს.