დღეს 15 ნოემბერს, 17:00 საათზე პარლამენტის ეროვნული ბიბლიოთეკის მე–3 კორპუსში ლიტერატურული კონკურსის „კალამი“ დასკვნითი ღონისძიება გაიმართება. არასამთავრობო ორგანიზაცია „პოზიტივის“, საქართველოს პარლამენტის ეროვნული ბიბლიოთეკის და სასჯელაღსრულების დეპარტამენტის თანაორგანიზატორობით გაიმართება წიგნის პრეზენტაცია, რომელშიც მსჯავრდებულთა 100–მდე ნაწარმოები შევიდა. კრებული პროექტის პარტნიორმა კომპანია „საუნჯემ“ გამოსცა უფასოდ.

ყოველწლიური ლიტერატურული კონკურსი „კალამი“ პატიმრებისთვის მიმდინარე წლის 25 ივლისს დაიწყო და მასში მონაწილეობა საქართველოს  მასშტაბით სასჯელაღსრულების ყველა დაწესებულებაში განთავსებულმა მსჯავრდებულებმა მიიღეს. კონკურსის ფარგლებში, მსჯავრდებულებს უნდა წარმოედგინათ ლიტერატურული ნაწარმოებები (პროზაული და ლირიკული). კონკურსის ჟიურის წევრები თავად პატიმრებმა შეარჩიეს. მათ შემოქმედებას მწერლები – დათო ტურაშვილი, რატი ამაღლობელი და თეონა დოლენჯაშვილი აფასებდნენ.

ღონისძიებას ცნობილი ტელეწამყვანი და მსახიობი ნანკა კალატოზიშვილი წაიყვანს. პრეზენტაციაზე მიწვეულები არიან საქართველოს სასჯელაღსრულების, პრობაციისა და იურიდიული დახმარების საკითხთა მინისტრი სოზარ სუბარი, კულტურისა და ძეგლთა დაცვის მინისტრი გურამ ოდიშარია, ჟიურის წევრები და სხვა ცნობილი საზოგადო მოღვაწეები.